Біздің тілшіміз аудандық полиция бөлімінің басшысы, полиция подполковнигі Сыздықов Ербол Аманғалиұлына жолығып, бөлімдегі атқарылып жатқан жұмыстар туралы сұрап, білген еді.
Полиция қызметкерлері – халықтың қорғаны. Олар үнемі ел тыныштығы жолында уақытпен санаспай қызмет етеді. Бөлімдегі полиция қызметкерлері қылмыстың алдын алып отырады. Ал қылмысты ашуда, қауіпсіздікті сақтауда жақсы жетістіктерге жетіп келеді. Басқа мамандықтарға қарағанда полиция қызметкері болу екі есе қырағылықты, сабырлы, төзімді, үлкен қажыр-қайратты қажет етеді. Шапшаң да жылдам қимылдау, тез арада шешім қабылдау, жылдам әрекет етуде тәртіп сақшыларына тән қасиет болуы керек.
Бөлімде криминалдық тергеу, әкімшілік, жергілікті полиция қызметі бөлімшелері жұмыс істейді. Онда өз істеріне берілген жүзден аса полиция қызметкерлері еңбек етеді. Ал ауылдық жерлерде 26 учаскелік инспектор және қосымша 11 көмекшісі бар. Олардың барлығы да қызметтік көліктермен қамтамасыз етілген. Олар өздеріне бекітілген аумақтардағы қылмысты болдырмау жолында әртүрлі деңгейдегі іс-шараларды өткізіп тұрады.
— Өз ісіне адал, шын берілген алдыңғы қатарлы полиция қызметкерлері туралы білсек?
— Бұл ретте өзімнің қызмет және кадр саясаты жөніндегі орынбасарларым, полиция подполковниктері Батырхан Жұмабеков пен Ғалымжан Оразбековті алдымен атап өтуге болады. Олар жеке құрамға өз салалары бойынша тапсырмалар беріп, оның уақытында орындалуын мұқият қадағалап отырады. Жас полиция қызметкерлерімен жұмысты бірлесе отырып жүргізеді. Сондай-ақ криминалдық және әкімшілік полиция бөлімшелерінің бастықтары, полиция подполковнигі Әділхан Сағынбаев, полиция майоры Бауыржан Мейірбеков, учаскелік инспекторлар жұмысын ұйымдастыру бөлімінің аға инспекторы Нұрлан Сыздықовтар өз салалары бойынша жақсы жетістіктерге жетіп жүрген жандар. Олар өз істерінің білгірі болумен қатар қоғамдық жұмыстарға белсене қатысып, өскелең ұрпаққа үлгі көрсетіп келеді. Жастарға өздерінің мол тәжірибесімен бөлісіп, оларды патриоттық, еңбексүйгіштік рухта тәрбиеленулеріне үлестерін қосуда.
Бөлімдегі тергеуші, полиция аға лейтенанты Дәуір Сқақов ауыр және аса ауыр қылмыстарды тергеуде біршама тәжірибе жинап қалды. Өзі тексеріп, тергеудегі материалдарын сотқа жолдауда жақсы жағынан көзге түсіп жүрген жастардың бірі. Ал кәмелетке толмағандар жөніндегі аға инспектор, полиция капитаны Ерлан Тұрғынбаев, учаскелік полиция инспекторының көмекшісі, полиция лейтенанты Бақытжан Жауынбековтер қызметке келгеніне көп уақыт бола қоймағанына қарамастан өздеріне бекітілген ауыл тұрғындарымен жақсы қарым-қатынаста жұмыс істейді.
Полиция қызметкерлері өз қызметтерімен қатар аудан, облыс көлемінде өтетін әртүрлі деңгейдегі іс-шараларға қатысып отырады. Мәселен, олар қару атудан жыл сайын облыстық жарыста жүлде алып жүр. Сондай-ақ спорттық жарыстардан да жүлдесіз қалған емес.
— Халықтың тыныштығы, қоғамның қауіпсіздігі, құқықтық тәртіпті қамтамасыз етуде кәсіби шеберліктерімен көзге түсіп жүрген полиция қызметкерлерін өздерінің кәсіби мерекелерімен тағы да құттықтап, ел тыныштығы жолындағы жұмыстарына сәттілік тілейміз. Әңгімеңізге көп рахмет.
