Елбасы Нұрсұлтан Назарбаев видеоүндеуін елордадағы резиденциясында жасаған.
Елбасы Нұрсұлтан Назарбаевтың Қазақстан халқына видеоүндеуді қайдан жолдағаны белгілі болды, деп хабарлайды Экспресс К
Нұрсұлтан Назарбаев соңғы рет 28 желтоқсанда Ресейдің Санкт-Петербург қаласында халық алдына шыққан. Кейін, тек 8 қаңтарда баспасөз хатшысы Айдос Үкібай оның елордада екенін айтты.
Ал бүгін Елбасы халық алдына шығып, өзінің зейнетте екенін айтып, видеоүндеу жолдады. Желіде осы үндеудің қай жерде жасалғанына қатысты алып-қашпа әңгімелер көбейді.
Соған орай Экспресс К тілшісі Тұңғыш Президенттің кабинетін бұрынғы жиын өткен кеңселермен салыстырып көрген еді. 6 желтоқсанда Қазақстанға Өзбекстан Президенті Шавкат Мирзиеев ресми сапармен келген болатын. Сол кезде Елбасы өзбек басшысын осы кабинетте қабылдаған. Бұл кездесуден фотолар Шавкат Мирзиеевтің Instagram-дағы парақшасында жарияланған. Сонымен қатар телеарналарда да видеосюжет бар.
Яғни бұл видео Елбасының резиденциясы саналатын кітапханадағы жұмыс бөлмесінен түсірілген.
Бұған дейін Нұрсұлтан Назарбаевтың 2022 жылы алғаш рет ел алдына шығып, видеоүндеу жолдағанын хабарлағанбыз.
