Мемлекет басшысы Қасым-Жомарт Тоқаевтың жаңа Жолдауы жарияланады дегелі бері, біз мұны асыға күткеніміз рас. Өйткені, Президентіміз бұған дейін де хабарлағандай, жаңа құжатты тағатсыздана тостық.Жылдың басты құжатында не айтылды екен, қандай салаларға басымдық беріледі, мемлекетіміздің алдағы саяси бағыты қандай болады, халықтың тұрмысы өзгере ме немесе әлемде болып жатқан геосаяси өзгерістердің салқыны біздің елге де тие ме, деген сан сауалдар жалпы қоғам мүшелерінің барлығын алаңдатқаны белгілі. Осындай күрделі сұрақтарға Мемлекет басшысы Қасым-Жомарт Кемелұлының Қазақстан халқына арнаған жаңа Жолдауында лайықты жауаптар берілді деген сенімдемін.
Жолдау туралы сөз қозғамас бұрын, Президенттің бұған дейін отандық телеарналарға берген сұхбатында айтылған құнды пікірлері туралы айтқым келеді. Президент сұхбат барысында былай деген еді.
«Жалпы, кез келген қиындықтың артында үлкен мүмкіндіктер тұр. Қытай тіліндегі «дағдарыс» деген сөздің «жаңа мүмкіндіктер» деген мағынасы бар. Осы ретте біз де күш-қуатымызды Отанымызды өркендетуге жұмсайық.
Әрине, азаматтық қоғаммен, дербес сарапшылармен ауқымды диалог жүргізу керек. Өйткені, халықтың пікірі өте маңызды. Мен «Адамдар мемлекет үшін емес, мемлекет адамдар үшін» деген ұстанымды жарияладым. Осыған байланысты Үкіметке тиісті ұсыныстар дайындауды тапсырдым», — деді Қасым-Жомарт Тоқаев өз сұхбатында.
Күні бүгін ғана Президенттің жаңа Жолдауы жарияланып, бұқараға жол тартып отыр. Президент «Қасіретті қаңтар» оқиғасына да егжей-тегжейлі тоқталып, оның елімізге, мемлекеттіміздің тәуелсіздігі мен қауіпсіздігіне тигізген зиянды салдарлары туралы баса айтты. Шынында, қаңтар оқиғасы тәуелсіздігімізге қауіп төндірген аса қасіретті оқиға болғаны рас. Еліміздің кешегі 30 жылда жүріп өткен тарихи жолын жоққа шығаруға, елде төңкеріс жасауға ұмтылған, билікті құлатып, оған нұқсан келтіруге, қорыта айтқанда, Отанға опасыздық жасауға бағытталған қанды оқиға деп бағаланып отыр. Аталған оқиғадан сабақ алып, алдағы болашағымызды мықтап ойланатын кез жетті. Аталған мәселелерге Президент те кеңінен тоқталып, ендігі кезекте мұндай жағдайдың қайтып орын алмауы үшін бірлігімізді бекемдеп, тірлігімізді түзеу қажеттігін есімізге салып отыр.
Жаңа Жолдауда Президенттің өкілеттігі туралы әңгіме қозғалып, ең бастысы, Парламенттің рөлін күшейту, саяси жаңғыруға бағытталған жаңа реформаларды қабылдау, сол арқылы ел экономикасын дамытып, халықтың әлеуметтік жағдайын жақсарту мәселелері де орынды айтылды. Одан бөлек, респубюликалық бюджеттің орындалуына да тоқталған Қасым-Жомарт Тоқаев, Есеп комитетінің жұмысын жетілдіріп, оның орнына жаңа құрылым құруды тапсырды.
Сонымен қатар, өкілді билік тармақтарының ішінде Парламент және жергілікті мәслихаттардың да рөлін күшейту, сайлау үдерісін жаңғырту, партиялық жүйені бәсекеге қабілетті ету, сот жүйесін нығайту, құқық қорғау институттарын күшейту сияқты тың өзгерістерді енгізу мәселелеріне баса мән беріліп отыр. Бұл ретте, ең бастысы, азаматтардың Конституциялық құқықтарын қамтамасыз ету және нығайту басты мәселе ретінде айтылды.
Президенттің жаңа Жолдауынан ұққанымыз, ендігі кезекте Ұлттық сенім кеңесінің орнына «Ұлттық құрылтай» деп аталатын жаңа қоғамдық институт құрылмақ. Одан бөлек, еліміздің әкімшілік аумақтық құрылымында да бірқатар өзгерістер орын алмақшы. Президент бұл туралы: «Мемлекеттің өркендеуі – аймақтардың қуатты болуына тікелей байланысты» деп атап өтіп, ел аумағында қосымша жаңадан үш облыс құрылатыны туралы айтты. Атап айтқанда, Семей өңірінен Абай облысы, Жезқазған өңірінен Ұлытау, сонымен қатар, Алматы облысын екіге бөліп, Жетісу облысын жаңадан құру жөнінде бастама көтеріліп отыр. Бұл мәселені жан-жақты ойластырып, жүзеге асыру керек деп тапсырды, Президент.
Үш облысты құру ісін алып қарайтын болсақ,бұл өте маңызды мәселе. Бұл ретте, қаншама адам жұмыспен қамтылатын болады. Тиісінше, үш облыстың құрылуымен бірге азаматтарға да жаңадан жұмыс орындары ашылады деген сөз.
Жаңа жолдау көпшілікке жол тартты. Жаңа Қазақстанды құрудағы алдағы бағыт-бағдарымыз да айқындалды. Ендігі кезектебарлық ел азаматтарының алдында қыруар міндеттер тұр. «Ел үмітін ер ақтар» демекші, қазіргідей күрделі кезеңде «бір жағадан бас, бір жеңнен қол шығарып» халық пен билік бір сапта болып, түсінісіп жұмыс істесе, алынбайтын қамал жоқ деп санаймын. Жаңа Қазақстанды құру ісіне барлығымыз атсалысайық!
Сейітхан ЖҰМАШЕВ,
Жуалы аудандық ардагерлер кеңесінің төрағасы.
Жуалы ауданының Құрметті азаматы.
