Ұлт саулығы жолында аянбай еңбек етіп, мыңдаған жанның өміріне араша болған жоғары санатты хирург, денсаулық сақтау ісінің ұйымдастырушысы, медицина ғылымдарының докторы, профессор, қоғам қайраткері, Қазақстан Журналистер одағының мүшесі Сағындық Ордабекұлы жуырда 75 жасқа толды.![]()
Өзінің саналы ғұмырын медицина саласына арнап, халық денсаулығы үшін өлшеусіз үлес қосқан абзал жанның еңбегі – тек Жамбыл облысының ғана емес, тұтас еліміздің мақтанышы. Оның білімі мен тәжірибесі, елімізге жасаған адал қызметі – ұрпақтарға үлгі. Сағындық Ордабекұлы – тек шебер дәрігер ғана емес, қоғамның өзекті мәселелеріне де үнемі үн қосып, ел игілігі үшін аянбай еңбек еткен тұлға. Осы орайда, облысымыздың апталдай азаматы Сағындық ағамыздың мерейтойына деген құттықтау мен құрметімізді көрсету сәрсенбінің сәтті күніне түсті. Бүгін облыстық мәслихат депутаттарының атынан және мәслихат аппаратының қызметкерлерімен бірге облыстың қадірлі азаматы, Сағындық Ордабекұлын арнайы жеке қабылдап, 75 жас мерейтойымен құттықтап, құрметімізді білдірдік. Ағамызға ұзақ ғұмыр тілей отыра алдағы уақытта ғылым мен әдебиеттегі, медицина саласындағы жаңа белестерді бағындыра беруге шын жүректен тілектес екенімізді жеткіздік.
Қадірлі Сағындық Ордабекұлы, сіздің еңбегіңіз медицина мен журналистиканың тоғысында шынайы үлгі боларлық тұлға екеніңізді көрсетеді. Әрдайым еліміздің денсаулық сақтау саласына сіңірген ерен еңбегіңіз бен шығармашылық қызметіңіз еленіп, халық алғысына бөлене беріңіз. Сізге зор денсаулық, шығармашылық шабыт, сарқылмас күш-қуат және отбасылық амандық тілеймін. Ғылым мен әдебиеттегі, медицина саласындағы жаңа белестерді бағындыру жолында абырой-беделіңіз асқақтай берсін!