Ұлттық валютаның бүгінгі сатылымы біршама құлдырап кетті. 23 ақпан күні 420-437 теңгенің арасында тұрған ұлттық валюта 472 теңгеге дейін құлдырады. Спекуляцияны одан әрі жалғыстырмас үшін Ұлттық банк валюталық интервенция жасап, құнсыздануды біршама тоқтатты.
Енді ары қарай теңгенің жағдайы не болмақ? Сарапшылардың пікіріне құлақ түрейік.
AERC Beta LLP бас директоры Ғалымжан Айтқазиннің айтуынша, теңгенің ендігі құны Ұлттық банктің валюталық интервенцияны ары қарай жүргізе ме әлде тоқтата ма – тікелей соған байланысты.
«Бүгін Ұлттық банктің интервенция жүзеге асырғаны белгілі. Егер теңгеге қысым күшейсе, тағы да валюталық интервенция жасауы мүмкін. Қазір теңгеміз біршама құлдырап кетті. Бұл дегеніміз – геосаяси жағдайдың ұлттық валютаға қатты әсер етеді деген сөз. Егер дау-дамай эскалацияға ауысса, онда теңгенің халі мүшкіл болмақ», — дейді ол.
«Меніңше, Ұлттық банк валюталық интервенцияны тек спекуляция кезінде қолданып жатыр. Алайда ұлттық валютаның құнсыздануына спекуляция емес, нарықтың өзі әсер етіп отырған сыңайлы. Мұны түсінген сәтте Ұлттық банк интервенцияны тоқтатады. Сол кезде теңге еркін ағымға кетеді», — деп топшылайды Айтқазин.
DAMU Capital Management компаниясының бас директоры Мұрат Қастаевтің айтуынша, теңгенің құлдырауы 500-600 теңгеге жете қоймайды.
«Теңгенің олай құлдырауына қазір нақты себеп жоқ. Қазақстан Ресеймен тығыз қарым-қатынаста дегеннің өзінде, біздің еліміздің өз экономикасы мен нарығы бар. Мұнай бағасы да қымбаттады. Сондықтан теңге аса құлдырай қоймас», — дейді Қастаев.
https://bugin.kz/23618-endi-tenhgeninh-dgaghdayy-ne-bolmaq-%E2%80%93-sarapshylar-pikiri
