«Астана» клубының жартылай қорғаушысы, Тараз футбол мектебінің түлегі Бахтиер Зайнутдинов енді ресейлік «Ростов» командасында доп тебеді. Жерлесімізге қысқы трансферде көрші мемлекеттің мамандары құда түсіп, келісімшарт бекіткен.
Бахтиер спорттық жолын «Тараз» футбол командасында бастап, 2017 жылы Қазақстан Премьер-лигасының ең жас үздік ойыншысы атанған. Ал өткен жылы футболшы «Астана» клубына ауысып, ел чемпионы болып ғана қоймай, кәрі құрлықтың айтулы аладоп аламандарында жасындай жарқылдады. Еуропа Лигасында «Астана» сапында алты кездесу өткізіп, ерекше шеберлігімен көзге түсті. Сондай-ақ ұлттық құраманың да ойынын алға жетелеп, жеңіске жетуге жігер қосты. Осындай таудай талабын ескерген ресейлік «Ростов» клубы жас талантты өз сапына алып отыр.
Естеріңізге сала кетсек, алдыңғы маусымда «Тараз» футбол мектебінен түлеп ұшқан Еркебұлан Сейдахметовті де ресейлік «Уфа» командасы аттай қалап, өздеріне алдырған еді. Енді міне, екінші жамбылдық футболшы Ресей Премьер-лигасында доп тепкелі тұр. Жерлестерімізге тек сәттілік жолдас болсын!
С. ТІЛЕУЖАН
