Шымкент қаласы әкімдігінің қолдауымен Шәмші Қалдаяқов филармониясында Сүгір оркестрінің орындауымен жерлесіміз, күйші-композитор, Қазақстанның еңбек сіңірген қайраткері, «Парасат», 2 дәрежелі «Достық» «Құрмет» ордендерінің иегері, Қазақ ұлттық өнер университетінің Құрметті профессоры, облысымыздың, ауданымыздың құрметті азаматы Әбдімомын Желдібаевтың 85 жас мерейтойына арналған «Ерке сылқым» атты шығармашылық кеші өтті.
Жоғары деңгейде ұйымдастырылған шараға Шу ауданынан арнайы делегация барып, жерлесімізді арнайы құттықтады. Нақтырақ айтқанда, аудан әкімінің орынбасары Нұрлан Жақсыбаев аудан басшысының құттықтауын жеткізіп, қазақы дәстүрмен абыз қариямыздың иығына шапан жауып, сый-сияпатын табыс етіп, құрмет көрсетілді. Одан бөлек, Шымкент қаласы әкімінің орынбасары Қуаныш Жұмабекұлы мен еліміздің мәдениет саласына елеулі үлес қосып жүрген бірқатар азаматтар жерлесімізге жылы лебіздерін жеткізді.
Концертте Ә.Желдібаевтың бірқатар туындылары орындалса, өнердегі төлқұжатына айналған атақты «Ерке сылқым» күйі Сүгір атындағы қазақ ұлттық халық аспаптар оркестрінің орындауында шырқалғанда көрермендер орындарынан тік тұрып құрмет көрсетті. Бұл да жерлесіміздің күй өнеріндегі құдіретін білдірсе керек.
Ауданымызбен қатар, тұтас еліміздің мақтанышына айналған біртуар күйші бар ғұмырын күй өнеріне арнағанын жұртшылық жақсы біледі. Жерлесіміздің ел мәдениетіне қосқан үлесі де ұшан-теңіз. Ол ауданда жүріп-ақ «Шу еркесі» халықтық ән-би ансамблінің негізін қалап, ансамбльдің республикалық, облыстық фестивальдерге қатысуына тікелей себепші болды. Ә.Желдібаев сексеннің сеңгіріне шықса да өңірдің мәдениет саласына әлі күнге дейін үлес қосып, артынан ерген шәкірттеріне жол көрсетіп келеді.
