| Өткен жылдың 26 тамызы күні ауданымыздың Қайнар ауылы маңында орналасқан №28349 әскери бөліміндегі оқ-дәрі сақталатын қоймада болған жарылыс ел есінен шыға қойған жоқ. Әскери қоймадағы алапат өртті сөндіру кезінде бірнеше азамат қайтыс болып, ондаған жауынгер жарақат алған еді. Сол жылдың 29 тамызы жарылыстан қаза тапқандарды аза тұту күні деп жарияланды. Алапат өртті өшіру барысында ерлікпен қаза тапқандар арасында біздің жерлестеріміз №28349 әскери бөлімінің офицері-капитан Ерлан Қырғызалиев, өрт сөндіруші-құтқарушы әскери бөлімінің бастығы Еркін Нәдірбеков, ведомстволық қорғау командасының атқышы Оразбек Дәлібаев, әскери команданың өрт сөндіруші-құтқарушы маманы Марат Мешінбай, №3 және №4 өрт сөндіру бөлімдерінің өрт сөндіруші-құтқарушылары, сержанттар Арнұр Темірболатов, Елдос Сандыбаев, кіші сержант Әділбек Әділет, қатардағы жауынгер Әліби Кеңес болды. Қазақстан Республикасы Президентінің Жарлығымен өздерінің қызметтік міндеттерін соңына дейін абыроймен атқарып, ерлікпен қаза тапқан капитан Ерлан Қырғызалиев бірінші дәрежелі «Айбын», Әділбек Әділет, Әліби Кеңес, Елдос Сандыбаев, Арнұр Темірболатов үшінші дәрежелі «Айбын» орденімен, Уразбек Дәлібаев, Марат Мешінбай, Еркін Нәдірбеков әртүрлі деңгейдегі марапаттармен марапатталды. Жарылыс кезінде жанқиярлықпен қаза болған жерлестеріміздің ерлігі мен өрлігін жас ұрпаққа дәріптеу, оларды ел есінде қалдыру мақсатында аудан орталығындағы әл-Фараби атындағы мәдениет үйі алдына олардың есімдері жазылып, суреттері қашалып салынған ескерткіш-тақта қойылды. Сондай-ақ өмірден ерте озған боздақтардың құрметіне әртүрлі іс-шаралар өткізілмек. Ерен ерліктерін көрсетіп, өмірден ерте озған ерлеріміздің есімдері ел жадында сақтала беретін болады.        
«Ауыл жаңалығы» — ақпарат. |
