Тараз қаласының әкімі Бақытжан Орынбековтің төрағалығымен өткен кезекті аппараттық кеңесте кері байланыс бағытындағы жұмыстар күн тәртібіне көтеріліп, талқыға түсті.
Жиында қала әкімдігі медиа орталығының директоры Балнұр Бектұрғанова баяндама жасап, былтырғы жылы әлеуметтік желілерде тұрғындар тарапынан 4308 мәселе көтерілгенін тілге тиек етті.
– Жалпы, жыл басынан бері әкімдіктің әлеуметтік желілеріне 2205 пост, 578 бейнеролик, 1235 баннер жарияланды. Дегенмен, жұмыс жасалған жерде мәселе болатыны анық. Былтыр Instagram әлеуметтік желісіндегі түрлі парақшаларда қалалық әкімдіктің ресми парақшасын белгілеу арқылы 4308 мәселе көтерілсе, ресми бұқаралық ақпарат құралдарында 495 мәселе назарға алынған. Келіп түскен барлық сұрақ тиісті жауаптармен қамтылуда, – деген орталық директоры былтырғы жылы «Жамбыл-109» порталына қосымша 9870 өтінім келіп түскенін де сөз етті.
Баяндаманы мұқият тыңдаған шаһар басшысы кешіктіріліп жабылатын өтінімдер болмауы керектігін жауаптыларға қатаң ескертті. Сондай-ақ күн тәртібіне көтеріліп отырған мәселенің маңыздылығына тоқталып, кері байланыс бағытындағы жұмыстарға жауапкершілікпен қарауды бөлім басшыларына тапсырды.
Аппараттық кеңесте бұдан бөлек жол, жарықтандыру, тұрғын үй құрылысы, спорт алаңшаларын салу, қала көшелеріндегі тазалық, атаулы әлеуметтік көмек, қаржының игерілуі мен мемлекеттік сатып алу конкурстарын уақытылы жариялау сынды мәселелер де қаралып, жауапты мамандарға нақты тапсырмалар жүктелді.
Тараз қаласының әкімдігі
