Талас ауданының мемлекеттік архивінің жұмыс жоспарына сәйкес «Ашық есік күні» өткізілді. Аталған іс-шараға Талас ауданы әкімдігі бөлімдерінің, ауылдық округ әкімдіктерінің, Қаратау құрылыс-техникалық колледжінің, Талас аудандық білім бөлімінің, «Азаматтарға арналған үкімет» мемлекеттік корпорациясы» КЕ АҚ Жамбыл облысы бойынша филиалы Талас аудандық бөлімінің мамандары, Жамбыл нотариаттық округінің нотариустері қатысты.
Архив мамандары күнделікті өтініштер мен хаттарды зерделеу, оған архивтік анықтамалар дайындау барысында кездесетін өзекті мәселелер туралы әңгімеледі. Атап айтқанда, көбіне әйел азаматшалардың тегі ауысқаны туралы өтініште жазылмауы, қосымша сенім хат немесе нотариат кеңсесінде куәландырылған куәліктің болмауы, өтініш иелерінің телефондарының дұрыс көрсетілмеуі, еңбек өтілі туралы анықтама талап етушілерден өтініш қабылдау барысында мекеменің, ұйымдардың нақты ресми атауын көрсетпей, басқаша ауызекі атауын жазуы, сондай-ақ бір өтінішпен бірнеше адам туралы мәліметтер сұратылғанда немесе бір өтінішпен бірнеше шешімге анықтама сұраған жағдайда жүйеге тіркеу, оған жауап дайындауда қиындық туындайтыны және тағы басқа мәселелер төңірегінде баса айтылды.
Сондықтан әрбір жеке тұлға туралы мәлімет бөлек өтінішпен берілуін және өтініштерді толтыру кезінде заңдылық сақталуын, тиісті мәліметтер толық қамтылуын, нотариат кеңсесінде куәландырылған сенім хат, мұрагерге мұрагерлік құқық беретін нотариат кеңсесінде рәсімделген куәліктерін, қажет болған жағдайда ескі құжаттарының көшірмесін қоса тіркеудің маңызды екенін мамандар толық жеткізді.
Жиын барысында «Азаматтарға арналған үкімет» мемлекеттік корпорациясы» КЕ АҚ Жамбыл облысы бойынша филиалының Талас аудандық бөлімінің бас маманы Н.Тауасаров, Бостандық ауылдық округінің маманы Р.Әбуталіп, Жамбыл нотариаттық округінің нотариустері Ж.Тулеулиев, Ж.Байбурина, Г.Саржанова мемлекеттік қызметті көрсетуге байланысты кездесетін әртүрлі мәселелерге тоқталды, сұрақтар қойылып, ұсыныстар айтылды.
Бұл күні жұмыс күні соңына дейін мамандар келушілердің сұрақтарын тыңдап, кеңестерін беріп, тиісті ұйымдарға сілтеме жасай отырып, түсіндірме жұмыстарын жүргізді. Мақсат-халыққа сапалы қызмет көрсету, сенімнен шығу. Өйткені халықтың талабы-басты бағыт.
З.Шекербек,
Талас ауданының мемлекеттік архивінің архивисті.
