Інісі құлдықта болған: Түркістан облысында бір-бірін 25 жыл көрмеген бауырлар табысты
Түркістан облысының полицейлері осыдан 25 жыл бұрын бауырын жоғалтқан әйелге оны табуға көмектесті, деп хабарлайды Stan.kz ақпарат агенттігі Polisia.kz-ке сілтеме жасап.
Жуырда полиция департаментіне жергілікті тұрғын Төле би ауданына қарасты ауылдардың бірінде жас жігітті құлдықта ұстап отырғанын хабарлаған. Полицейлер оқиға орнына жетіп, жас жігіттің ата-анасы ертеректе қайтыс болғанын анықтады. Одан кейін бала жетімдер үйіне, кейін интернатқа түскен. Оны аяқтаған соң, 10 жылдай әркімнің шаруашылығында «малай» болып жүрген, иелерінің қорлығына ұшыраған.
Ол туыстарының қайда екенін білмейтінін айтқан. Алайда полицейлер небәрі бірнеше сағаттың ішінде оның жақындарын тапты. Олардың Түркістанға жақын маңда Сауран ауданында тұратыны анықталды.
Полиция департаментіне жігіттің әпкесі мен жездесі жеткізілді. 25 жыл бұрын айырылысқан бауырлар сол жерде жүздесті.
Әпкесінің айтуынша, ата-анасы олардың бала күнінде қайтыс болған. Қыз туыстарының үйінде тәрбиеленсе, оның бауырларын балалар үйіне жіберген. Ұлдардың үлкені — 9 жаста, кенжесі — 4 жаста болған. Кішісінің қайда екені белгісіз.
Соңғы екі жыл бойы әйел бауырларын өздігінен іздеуге тырысқан. Бірақ полицияға жүгініп көрмепті. Ботагөз Толыбаева полицейлерге көрсеткен қызметі үшін алғыс білдірді.
