Адамзат алдында тұратын ұлы мұрат — міндеттердің ең бастысы – өзінің ісін, өмірін жалғастыратын салауатты, саналы, рухани бай және ақыл парасаты мол, мәдени ғылыми өрісі озық азамат тәрбиелеу. Бұл біздің қоғам алдындағы борышымыз.
Еліміздің ертеңі, мемлекетіміздің жарқын болашағы, білімді де білгір жастардың қолында.
Жастар алдынғы буын ағалардың жолын лайықты жалғастырып, өздерінің сенімді ізбасар екенін дәлелдеуде.
Жастар – қоғам өмірін алға бастаушы прогрессивті күш иесі екенін қай қоғамда да дәлелдеп келеді.
Қай заманда болмасын қоғамның қозғаушы күші – жастар, бүгінде озық идеяларымен қаруланып, еліміздің дамып, өркендеуіне барынша үлес қосып келеді.
Мен жастарға сенемін. Мағжан айтқан жастардың қанаты қатайып келеді.
Талас ауданында ауыл мектептері арасындағы “IQANAT” республикалық олимпиадасының аудандық кезеңі өтті.
IQanat — 150-ден астам қазақстандық кәсіпкер қолдайтын, ауыл балаларына әлем бойынша ең жақсы білім алуға бірегей мүмкіндік беретін әлеуметтік-білім беру жобасы.
Бұл жолғы IQanat олимпиадасының аудандық кезеңіне 384 оқушы қатысты.
Бұл ерекше сайыста балалардың академиялық жетістіктеріне қарамастан, әрқайсысына өз қабілетін көрсетуге мүмкіндік берілген. IQanat тапсырмалары дәстүрлі тестілеуден ерекшеленіп, логикалық және математикалық ойлау, оқу сауаттылығы және қазақ тілін меңгеру дағдыларын бағалауға бағытталған.
IQanat жобасы ауыл балаларына ең қажетті дағдыларды жүйелі түрде меңгеруге көмектеседі. Бұл – біздің еліміздің тұрақты дамуына қосқан үлкен үлес.
IQanat олимпиадасының мақсаты — жалпы білім беретін мектеп оқушыларын іріктеп, дарынды балаларды анықтап, оларға тегін IQanat мектебіне жолдама беру
. Бүгінгі сайыстан орын алған оқушылар келесі кезеңдерге жолдама алады. Олимпиада қорытындысы Iqanat-тың ресми сайтында жарияланады.
Ал, республикалық кезеңге жолдама алмаған оқушыларға әр-түрлі деңгейдегі жүлделі орындар мен қатысқаны үшін сертификаттар табысталады.
Сонымен қатар ауыл олимпиадасының тағы бір ерекшелігі — жастарды ынталандыру, жұртшылықтың алдында еркін сөйлеуге үйрету.
Болашақ жастардың қолында деген ұрандарды жиі айтып, елімізде осы мақсаттарда қолға алынып жатқан жобалар аз емес.
Тек оны өз керегіне қарай пайдалану әрбір жастың құзырындағы жұмыс.
Мемлекет тарапынан жасалынып жатқан бар мүмкіндіктерді тиімді пайдалануға әрбір жастың өз ұмтылысы болуы тиіс.
Өйткені өмір ағыны тоқтамақ емес, жастық шақтың да жарқ етіп өте шығары баршаға мәлім.
Қашан да, болашағын алыстан бағамдайтын қазақ «қыстың қамын жаз ойла» демеуші ме еді!?
Ендеше Қазақстанның жарқын болашағы үшін қандай да бір іс тындыруға міндетті екенімізді естен шығармайық!
Барша қатысушыларға сәттілік тілеймін!
Мақсат Қазанғапов, Талас аудандық білім бөлімінің басшысы
