«AMANAT» партиясы Жамбыл облыстық филиалы жанындағы
Азаматтық қоғам мен мәдениетті дамыту жөніндегі «Мирас» аймақтық кеңесінің отырысы өтті.
Кеңестің күн тәртібінде Тараз қаласындағы мәдениет саласының дамуы мен алдағы жоспары, Партияның Жол картасындағы «Туризмді дамыту» бағыты бойынша және облыста туризмнің тұрақты дамуын қамтамасыз ету, облыстың туристік имиджін қалыптастыру мәселелері қаралды.
Жиында Тараз қалалық мәдениет және тілдерді дамыту бөлімінің басшысы Бақыт Тоқсанбаеваның есебі тыңдалды. Оның сөзінше, қала тұрғындарының рухани сұраныстарын қанағаттандыру мақсатында, сонымен бірге қала тұрғындары мен қонақтарының бос уақытын тиімді пайдалы ұйымдастыру үшін 2024 жылдың 12 айында 1993 мәдени іс-шара өткен. Сондай-ақ, ол «AMANAT» партиясының сайлауалды бағдарламасын іске асыру жөніндегі Тараз қаласы бойынша 2023-2027 жылдарға арналған іс-шаралар мен көрсеткіштерінің мәдениет саласы бойынша 2024 жылға қойылған 2 тармақ бойынша жұмыстар толығымен орындалғанын жеткізді.
Бұдан өзге, облыс әкімдігі кәсіпкерлік және индустриалды-инновациялық дамыту басқармасы басшысының орынбасары Гүлнұр Журабекова ағымдағы жылдың 3 тоқсанының қорытындысы бойынша облысқа 151 110 турист келіп, өткен жылдың сәйкес кезеңімен салыстырғанда туристер саны 137,9%-ға артқанын сөз етті.
Өз кезегінде, кеңес мүшелері туристік орындардың инфрақұрылымдық мәселелері әлі де толық шешілмегенін жеткізді. Бұл орайда, тиісті қаржыны уақытылы бөлдіріп, аталған мәселені оңтайлы шешу туралы ұсыныстарын білдірді.
