Зауыт өнімін тұтынушы негізінен қазақстандық өндіріс орындары болғанымен Тәжікстан, Ресей және соңғы кездері Монғолия секілді мемлекеттерге де жіберілуде.
Бұдан басқа да сұраныстар көптеп түсуде.
Серіктестік қазір жылына 15 мың тонна натрий цианидін және оған қосымша 5 мың тонна аммоний сульфатын шығарады. Зауыт өніміне деген нарықтағы сұраныстың өсуіне байланысты тағы да жылына 15 мың тонна натрий цианидін шығаратын екінші кезеңін қолға алуды көздеп отыр.
582 адам еңбек ететін осы кәсіпорын химиктер күні мерекесін жан-жақты атап өтті. Әсіресе, спорттың 5 түрінен командалық және жекелей біріншіліктер ұйымдастырылу барысына ұжым мүшелері белсене атсалысты.
Бас жүлдені 12 команда сарапқа салды. Әр команда құрамындағы 8 ер және 5 әйел кісілер кедергілермен жүгіру, гір тасын көтеру, дартс, турникке тартылу және арқан тарту сынды спорт түрлерінен сынға түсті.
Аса тартысты әрі қызықты өткен бәсеке барысында командалық есепте «ПСКиЦН» цехы бас жүлдеге ие болса, «ОМТСиОС» цехы-екінші орынды еншіледі. Ал, үшінші орынға табан тіреген «ЭНЦ» цехы жүлдегерлер құрамын түйіндеді.
Барлық жеңімпаз және жүлдегерлер қатарынан көрінген командалар мен жеке спортшыларға өндіріс орның бас директоры Қанат Еркебаев марапаттады.
Дүйсен Молдақұлов, «Talas tynysy».
