Жамбыл облысы әкімінің орынбасары Үйсімбаев Еркін Құлымбайұлы Сарысу ауданына жұмыс сапарымен келді.
Облыс әкімінің орынбасары іссапарын ең алдымен Түркістан ауылдық округіндегі әлеуметтік нысандары аралаудан бастады.
Ауылдық округке қарасты Ә. Бүркітбаев, Үшбас, Арыстанды елді мекендерінің тыныс – тіршілігімен танысты.
Елді мекендердегі мектептер мен клуб үйлерінде, кітапханаларда, ауылдық мешіттер мен балабақшаларда болды.
Аудан әкімінің орынбасары Еркебұлан Есмаханов, аудандық білім бөлімінің басшысы И. Баймағамбетов және әлеуметтік нысандардың жетекшілері атқарылып жатқан жұмыстарды, бүгінгі таңдағы жетістіктерін айтып, нысандардың қысқы маусымға дайындығын баяндады.
Арыстанды ауылында Еркін Құлымбайұлы ауыл тұрғындарымен кездесіп, мәселелерін тыңдады. Тұрғындар тарапынан көтерілген сұрақтардың бақылауда болатындығын айтты.
Негізінен күрді ұлтының өкілдері көбірек шоғырланған ауылдағы жиында ұлтаралық келісімді нығайту тақырыбында келелі әңгіме қозғады.
Арыстанды ауылындағы салынып жатқан мешіттің құрылысымен танысып, діни ахуал мен мешіттердің қызметі жөнінде айтып өтті.
Бұдан кейін, Жаңатас қаласындағы биылғы жылы күрделі жөндеу жұмыстары жүргізілетін Абылайхан мектеп-лицейінде және М. Әуезов мектеп-гимназиясында болды. Ғимараттарға жүргізілетін жөндеу жұмыстарының сапалы жүргізілуін әрі уақытылы аяқталуын қадағалауды тапсырды.
Сонымен қатар, облыс әкімінің орынбасары Еркін Үйсімбаев биыл күрделі жөндеу жұмыстары жүргізілетін Өндіріс ауылындағы клуб үйінің және Жаңаталап ауылындағы Жаңаталап орта мектебіне жапсарлас салынып жатқан спорт зал мен асхананың құрылыс жұмыстарымен танысты.
Жөндеу жұмыстарына байланысты жауапты тұлғаларға тапсырмалар берді.
Ауылдық округтердегі жұмыс барысымен танысқан облыс әкімінің орынбасары Еркін Құлымбайұлы атқарылып жатқан жұмыстарға оң пікірін білдірді.
Сарысу ауданы әкімдігі
