Бүгінгі күні ауылдағы ағайынның ахуалы жақсарып келе жатқаны ақиқат. Күн тәртібіндегі күйіп тұрған мәселелер де жоқ емес. Дегенмен олар да кезең-кезеңімен шешіліп келеді. Инфрақұрылыммен қамтамасыз ету жұмыстары да жолға қойылған. Жол, су, жарық секілді сұрақтары шешілген жұрт көгілдір отынға қосылуды көксейді. Көмір жағып, күл шығару тірлігі тезек жағып, нан жапқан аналарды әбден шаршатқаны рас. Алайда, қазіргі кезде ауданымыздағы елді мекендерді көгілдір отынмен қамтамасыз ету жұмыстары ерекше қарқын ала бастады.
Сейсенбі күні Тасөткел су қоймасы маңындағы Тасөткел ауылында көптің тілеуі орындалып, көгілдір отынды іске қосу салтанаты өткен болатын. Шараға жиылған жұртшылықтың жүректегі қуаныштарын жанарлары аңғартып тұрды. Себебі аудан орталығынан алшақ орна-ласқан ауылдың басты мәсе-лесінің бірі — газға қосылу еді.
Аталған шараға аудан әкімінің орынбасары Нұрлан Жақсыбаев қатысып, тұрғындарды мерейлі сәтпен құттықтап, ақжарма тілегін жеткізді. Сондай-ақ ұстаздық қызметтен зейнетке шыққан Ұлтуған Шәметова, ауыл қариясы Жұмағали Қисықов сөз алып, кеуделерін кернеген қуанышпен бөлісті. Осындай игі іске ұйытқы болған жандарға өз ризашылықтарын білдірді.
-Ауылымыз оңаша орналасқан. Көзге түсе бермейді. Аудан басшылығына айтып жүріп бірқатар жұмыстар жүйесін тапты. Тілеуіміздің бірі — газ еді, бүгін оған да қол жеткізіп отырмыз. Енді күйелеш болып, көмір жағып, күл шығармайтын болдық. Осы іске ұйысқан барлық ұйымдастырушыларға рақмет айтамын,-деген Ұлтуған Шәменова ауылдастарын газға қосылуға шақырды.
Жүрекжарды тілектер айтыл-ған соң лента қию рәсімін жасап, тетікті іске қосты. Дәстүрге сай шашу шашылып, жайылған шағын дастарханнан дәм берілді.
Енді 55 түтіні бар бұл ауылдың тұрғындары 153 мың теңге төлеп, табиғи газдың тамашасына куә болуға мүмкіндіктері бар. «Қордай» автоматтандырылған газ тарату бекетінен Шу қаласына дейін жүргізілген құбырдан таратылған көгілдір отынды тарту жұмысын негізгі жәшікке дейін «Газстрой» ЖШС, ауылішілік жұмыстарды «Дамустрой» ЖШС жүргізген.
Баға баршаға қолжетімді болуы үшін бұл игілік мемлекеттік бюджет есебінен екендігін еске салған жөн. «Шкафты газды реттеу пункті толық қосылу үшін кемінде 10 үй келісімшартқа отыруы тиіс. Ауыл шетіне газ келіп тұр. Енді тек тұрғындар тезірек тиісті төлемдерді жасап, қытымыр қыстан бұрын қосылып алғандары абзал»-дейді «ҚазТрансГаз Аймақ» аудандық филиалының шебері Данияр Ибраев.
Жиын соңында Нұрлан Сегізбайұлы Жұмағали Қисықовтың үйіне барып, көгілдір отынды қосу қуанышын көріп, құттықтап қайтты.
