Көкбастау ауылдық округі – тіршілігі түлеген өңір Жуалы ауданына қарасты Көкбастау ауылдық округі – аудан орталығына жақын орналасқан, табиғаты көркем, ауыл шаруашылығына қолайлы аймақтардың бірі. 1993 жылы құрылған округтің орталығы – Теріс ауылы. Жалпы жер көлемі 39 091 гектарды құрайды. Оның ішінде 21 555 гектары – ауыл шаруашылығы мақсатындағы жерлер.
Ауыл тұрғындарының негізгі күнкөріс көзі – егін және мал шаруашылығы. Округ бойынша 4 ауыл, 11 көше, 539 аула бар. Жалпы халық саны – 3284 адам. Оның ішінде 285-і зейнеткер, 103-і мүмкіндігі шектеулі азамат, 983-і жастар. Бұл – жалпы ауыл халқының шамамен 30 пайызын жастар құрайтынын көрсетеді.
Ауылдық округте 2 орта, 1 бастауыш мектеп, 3 балабақша, 4 дәрігерлік нысан, 1 мәдениет үйі, 3 ауылдық клуб, 4 кітапхана және 1 пошта бөлімшесі тұрақты жұмыс істейді. Бұл – тұрғындардың әлеуметтік қажеттіліктерін қамтуда маңызға ие инфрақұрылым.
Соңғы жылдары округте ауыл шаруашылығы, инфрақұрылым және әлеуметтік салада бірқатар маңызды жобалар жүзеге асырылып, ауылдың даму қарқыны айтарлықтай артқан. Мәселен, Көктөбе ауылындағы Жамбыл және Бейсен ата көшелеріне орта жөндеу жүргізіліп, асфальт төселген. Ал, жол қауіпсіздігі үшін Көктөбе ауылы А.Иманалыұлы көшесі мен Қосбөлтек ауылы Ә.Қойбақұлы көшесіне, сондай-ақ №30 Көктөбе орта мектебінің маңына жаяу жүргіншілер жолы салынған болса, Қосбөлтек ауылына жаяу жүргіншілер көпірі орнатылған.
Бұдан бөлек, №30 Көктөбе орта мектебіне күрделі жөндеу жұмыстары жүргізілген. Теріс ауылында жаңадан фельдшерлік-акушерлік пункт (ФАП) салынып, ел игілігіне пайдалануға берілген. Сонымен қатар, Көктөбе ауылының Бейсен ата көшесіндегі ескі жарықшамдар заманауи, кабельді шамдарға ауыстырылған. Теріс ауылындағы Бектеміс көшесі мен Қосбөлтек ауылындағы Оразбайұлы Жапарқұл көшесіне де көше шамдары орнатылған.
Ұлы Жеңістің 80 жылдығына орай, Теріс ауылындағы Ұлы Отан соғысының жауынгерлеріне арналған ескерткіш монументке жөндеу жұмыстары жүргізіліп, тарихи нысан қалпына келтірілген.
Жастарға қолдау көрсету мен салауатты өмір салтын қалыптастыру бағытында да нақты қадамдар жасалған. Көктөбе және Бақалы ауылдарында кіші футбол алаңшалары, Street Workout және балалар ойын алаңдары салынған.
2025 жылға жоспарланған жұмыстар қатарында Теріс ауылындағы төрт көшеге жол салу және Бақалы ауылына орталықтандырылған ауызсу жүйесін тарту бар. Ауыл әкімі Мәлік Сейтаевтың айтуынша, бұл жобалар тұрғындардың өмір сапасын жақсартып, инфрақұрылымды біртіндеп жаңғыртуға бағытталған.
Көкбастау ауылдық округі – ауыл шаруашылығына бейімделген, табиғи әлеуеті мол аймақ. Мұндағы халықтың еңбекқорлығы мен мемлекеттік қолдаудың үйлесуі округтің тұрақты дамуына серпін беруде. Әлеуметтік нысандардың жаңаруы мен жастарға жасалып жатқан қолдау – болашаққа сенімді қадамның айқын көрінісі.
