Өткені мен бүгінін ой таразысына салып, саралап, салмақтап, кейінгі ұрпаққа үлгі көрсетуге бекінген ағалардың алды әрқашанда ақ жайлау. Кімді де болса жатсынбай, жақынымдай қарсы алып, әңгіме тиегін ағытудан, ел жайлы, ертең жайлы айтудан жалыққан емеспін. Көкжиегі кең, көл-көсір ырыс-несібесі бар Көктөбе ауылының арғы-бергі тарихын ақтарсаңыз, көсегесі көгерген ауыл екенін аңғарасыз. Сонау 1921 жылы ұйымдасқан ауылымыз бірде тарап, бірде түрлі бөліністерге бөліне жүріп құрылды. 1934 жылдың көктемінде ұжымшар мүшелерінің талап-тілегіне сай Ленин аталған ұжымшар екіге бөлінеді. Көшпей орнында отырып қалғандары «Ленин» атын сақтап, тау жаққа көшіп шыққандары өздерін «Көктөбе» ұжымшары деп атайды. Сол тұста Ленин ұжымшарына төраға болып Алғадай Омаров, Көктөбеге Әлдешбай Әділбаев сайланды. «Көктөбе» ұжымшарына 1935 жылы Ағаділ Ғалиақпаров төрағалыққа сайланып, 1940 жылға дейін тер төге еңбек етті. Ол басшылыққа келгенде Көктөбеде небәрі 65 түтін болған. Дәл осы 1935 жылда көктөбеліктер егіннен көп өнім алған. Мұнан кейін басшылық еткен Асанбек Жұрынбаевтың тұсында да ауылдың еңбегін белінен басқан шаруалар тәтті түбірден тау тұрғызды. 1950 жылы таудағы «Кербұлақ», «Қарауылтөбе» ұжымшарлары ірілендіруге байланысты Көктөбе, Ленин ұжымшарларына келіп қосылады. Ал 1955 жылы Ленин ұжымшары Көктөбе шаруашылығына бірігіп, Жамбыл атындағы ұжымшар аталады. Соғыстан кейінгі жылдарда да ауыл шаруашылығы одан әрі өркендей түсті. Төл алудан алдына жан салмаған Тұрғынбай
Саңрақбаев Социалистік Еңбек Ері атағын алып, ауылдың абыройы көтерілді. Ал, 1940-1960 жылдары ұжымшарды басқарған Асанбек Жұрынбаев «Ленин», «Еңбек Қызыл Ту» ордендерімен, Тұрысбек Жазылбеков «Еңбек Даңқы» орденімен марапатталды. Сол бір сабақтастықтың тіні үзілмей, бүгінгі ұрпақ та ата кәсіпті қолға алып, шаруасын шалқытуда. Еңбекпен есейген ауыл өнерден де кенде емес еді.
Топырағынан талай таланттарды түлеткен қасиетті өлкенің сән-салтанатын келістірген жандар жетерлік. 1964 жылы ауылға «Халық театры» атағы беріліп, театр мүшелері сахналық қойылымдарымен
облыс көлемінде гастрольге шығып жүрді. «Ерке сылқым» күйімен Әбдімомын Желдібаев, «Сәулешім» әнімен Серік Әденов республикаға танылып, әлі күнге дейін тамаша туындыларымен елді қуантып келеді. Жазушылар Қарауылбек Қазиев, Әлдихан Қалдыбаевтар туып өскен ауылының әсем табиғатын, ауылдағы ақ пейілді ағайындарын көркем тілмен ше- бер бейнеледі. Композитор әрі әнші Әшірәлі Шынқожаевтың 22 күйі нотаға түсіріліп, кітап болып шықты. Республикалық оркестрдің негізін қалаған
Ұялбай Нүсіпов, Қазақстанның Халық әртісі Қадір Жетпісбаев, танымал журналистер Мұрат Сыздықов, Жахан Қожағұлов, Ахметжан Қосақов, Қуаныш Иембердиев, Диқан Әбдиев, Тоқсанбай Жабайылдаев, ғылым кандидаттары Сәбит Нұрбеков, Ғалымжан Бексейітов, зиялы заңгер Орынбасар Әбуевтер де осы ауылдың тумалары екендігін айтып, кеудемізді кере мақтанамыз. Қазақылықтың иісі аңқып тұратын, салт-дәстүрдің қаймағы бұзылмаған, үлкенге құрмет, кішіге ізеттің нақ үлгісі көрінетін, еңбек пен бейнеттің жарасымды көрінісі көзге ұратын, іргелі азаматтарымен мақтанатын ауылымыздың мәртебесі биіктей берсін!
Бақтыбек ЖАМАНҚҰЛОВ,
Жаңақоғам ауылдық округінің ақсақалдар алқасының төрағасы.
