Мәжіліс депутаты Нартай Аралбайұлы 5 минут көлігі оталып тұрған адамдарды жазалау туралы шешімді қайта қарау туралы ұсынысты уәкілетті министрлік мақұлдағанын айтты.
Бұл жайлы депутат өзінің инстаграм-парақшасында жазды.
«Жолаушыларды автомобильмен тасымалдау саласындағы мемлекеттің міндеттерін өзін-өзі реттеу ұйымына беру, жекеменшік СРО-ға тастай салу үлкен қателік! Осы шикі қадамды көздеген заң жобасы Мәжіліске келген еді. Біз бірден қарсы болдық», — деді мәжіліс депутаты.
Нартай Аралбайұлы оның екі себебін атады:
- Заң жобасы өзін-өзі реттеу ұйымдарына жолаушылар тасымалындағы тарифті белгілеу, бағаны реттеу құзыреттерін бермек. Бұл — қате. Құрылуы мүмкін өзін-өзі реттеу ұйымдары азаматтарымызды аямайтыны екібастан белгілі. Бұл жерде тұтас саланы жекеменшік ұжымдарға жығып беру — монополияны қолдан жасауға бағытталған қисынсыз әрекет.
- Жолаушыларды автомобильмен тасымалдау саласындағы қауіпсіздік мәселелерін өзін-өзі реттеу ұйымына беру — адамдардың өміріне жүрдім-бардым қараудың нақты көрінісі. Ақшаның артынан қуған жекеменшік ұйымдар қауіпсіздікке қалай болса солай қарайтыны айтпаса да түсінікті. Біздің елде де жол апаттары жыл сайын жүздеген адамның өмірін жалмайды, бұл проблеманы мемлекеттік органдар шеше алмай отырып, ақыр аяғында жолдағы қауіпсіздікті өзін-өзі реттеу ұйымына бере салу туралы шешімдері ақылды адамның әрекеті емес.
«Аталған заң жобасы Мәжілістің мұрағатына түсті. Таксистерді өзін-өзі реттеу ұйымына кіруге, жарна төлеуге міндеттейтін заң жобасы тоқтатылды! Көлік министрлігі бірнеше облыста пилоттық режимде жобаны сынап көру керек, халық дұрыс десе ғана заң қайта қаралады. Әйтпесе бұған жол жоқ! Көлік министрі келісті», — деп жазды ол.
Өткен Мәжілісте Нартай Аралбайұлы автокөлікті 5 минуттан артық оталдырып тұруға тыйым салатын министрліктің шешімін дереу өзгерту керек деген талап қойған болатын.
«Бүгін ІІМ орынбасары депутаттар тарапынан бұл нормаға қатысты ұсыныс болса оны қарауға, қолдауға дайын екенін жеткізді», — дейді мәжіліс депутаты.
https://massaget.kz/news/kolkt-5-minuttan-artyik-otaldyiru-nartay-aralbayulyi-jaksyi-124698/?fbclid=IwY2xjawII11BleHRuA2FlbQIxMQABHX7YCOdqGBlmKOuALybqhFxijglm1rfOSxvOjPp9yZr9i6Q7Yegco2zigQ_aem__VuXBPtYBDWqz4Vy_bWBnQ
Фото: Мәжілістің баспасөз қызметі
