Жас келін кезім, ақ пен қараны ажыратып жүрген кез десе де болғандай. Менімен бірге түскен көршіде де келін бар еді. Сөзіміз жарасып кетпесе де сəлеміміз түзу болатын. Ата-енесі жəне атасының шешесі яғни үлкен енесі де бірге тұратын. Келіні үнемі атасын мақтайтын жақсы кісі деп.
Бір күні үйіне бара қалсам ата-анасы келіп кіріп жатыр екен. Амандасып, қайта ізіммен қайтпақшы болғанымда үлкен ене шəй қойып, демдеп жібер деп бұйыра сөйледі. Ішке кірген құдаларға əп-сəтте шəй дайындадым. Құдалар ашулы, қызына араша түсуге келіпті.
— Енесі күн көрсетпейді екен. Барлық тірлігіне араласып, ақыл айтқыш көрінеді. Әр ісінен мін тауып баласына айдап салатынға ұқсайды деп құдағи келгеннен адуындана сөйледі.
Құдамызға əңгіме жоқ, жақсы кісі деп сөзге араласты құда. Құдалас болғанда өзіме ұқсаған ақкөңіл жан екен деп құдасын мақтады келіннің əкесі.
Бағанадан үнсіз тыңдаған үлкен əже:
— Айтарларыңды тыңдадық, ал енді мені тыңда! — деп даусы қатқыл шықты.
— Мақтап отырған құдаларың ол менің ұлым. Кезінде ішті, шекті, ұрды, жанжалдың түрін көрсеткен. Соның барлық жаманын жасырып, жақсы кісі болуына мына сендер жамандап отырған келінімнің үлесі зор. Мені ене деп сыйласа ұлымды ерім деп сыйлады. Бір ауыз əй дескен жоқ бізбенен. Сондай əйел тірлігіне араласып ақылын уйретсе мына сенің де қызың жаман қатын болмас еді. Енеден жыю, ерінен тыю көрсе ақылды ана болары сөзсіз. Құдам өзім сияқты жақсы дейсің ғой, құда, бірақ тап саған ұқсаса өзім-ақ тепкілеп тастар едім. Аздаған қиыншылыққа шыдамаған, əрбір істі анасына əсерелеп айтқан қызға ақыл айтудың орнына, мəн жайды анықтамай қатынның айтқанына еріп босағама ашумен келіп отырған сізге менің балам ұқсамай ақ қойсын. Қатыны би уйден қыз алма деуші еді, мен еркегі би уйден қыз алдым деп үміттенемін. Осы айтқаныма көнсең шəй ішіп ет жеп қонағым бол, көнбесең қызың əне ұстамаймын. Маған 25 жыл қызмет қылған келінімді жамандауға құқыларың жоқ, кеше келіп төр менікі деген қызың адам болсын десең осы қатынға тапсыр. Ада болсын десең батамды берем жолы болсын! — деп сөзін аяқтады.
Үнсіздіктен соң шəйға бата жасалып құда-құдағай үйден шыққанша асықты. Қызы мен əйеліне бір ауыз сөз сөйлетпей ізіне қайтты.
Кəзір сол келіншек бақытты ана, суйікті келін. Əжеміз өмірден өтседе сөздері əлі есімде. Осы əжедей отбасы ұйытқысы болсақ, əдемі қартайсақ кəнекей…
P.S.
Әңгіме әлемжеліден алынды
