Қарағанды облысы Қарқаралы ауданының тумасы Сұңғат Сәдуақасов – ERG құрамындағы «Қазхром» АҚ филиалы – «Қазмарганец» кен басқармасының механигі. Өндірістегі еңбек өтілі 10 жылға таяған жөндеуші өмірлік мақсаттарының орындалуына «Қазхромның» жол ашқанын айтады.
Бала күнінен еңбекке төселген жас жігіт Экспресс К тілшісіне мамандығы туралы айтып берді.
Сұңғаттың бұл мамандықты таңдауына жастайынан темір-терсек, құрал-сайманға деген қызығушылығы сеп болды. Ауылдан қалаға қоныс аударған Сәдуақасовтардың кенжесі техникалық колледждің «жөндеу механигі» мамандығына түсіп, өндіріске қарай бағыт бұра бастады. 2012 жылы жүрек қалауымен «Қазмарганец» кенбасқармасының, ол кездегі «Шығыс Қамыс» кенішіне шебер болып орналасты. Шеберліктен басталған еңбек жолында Сұңғат тек жөндеуші-механик болып қана қоймай, марганец өнімін ұсақтаушы, бункерші сынды түрлі кәсіптерді меңгеріп шығады. Энергия-механикалық қызметіндегі ауыр техникаларды өз бақылауында ұстап, жауапты қызмет — бригадирлікті де алып жүрді.
Бүгінде «Тур» кенішінің жөндеу бойынша механигі қызметін абыроймен атқарып келеді. Кен басқармаға келгенде өзіне жетекшілік еткен бас механиктер Бақыт Дүйсенбаев, Құрман Ахмадиев, Ерқанат Кенбаев секілді тәлімгерлеріне алғысы шексіз. Олармен бүгінде әріптес, тіпті кейбірі өзінің қарамағында еңбек етеді. Ұстаз үшін бақыт — шәкіртінің өзінен оза шауып, жетістікке жетуі.
Ол 15 күндік вахтада оннан аса техника мен жабдықтарды жөндеуден өткізеді. Кеніште өндірілген марганец өнімін тиеп-жөнелтуге аттанатын әр техниканың жағдайы, олардың тоқтап қалмауы — Сұңғат пен оның әріптестерінің қолында.
Белсенді қызметкер корпоративтік шаралардан да қалыс қалмайды. Қарағандылық әріптесіміз осыдан бірнеше жыл бұрын «Қазхромның» Ақтөбеде өткен туристік слетіне, Хромтау қаласында өткен Еуразиялық ойындардың үздік ойыншысы ретінде жолы түссе, өткен жылдың қазан айында Дөң тау-кен байыту комбинатының тау-кен көлік тасымалдау цехына тәжірибе алмасуға келіп те үлгеріпті. Ірі цехтардың бірі саналатын бұл бөлімдегі техникалардың түрлері кеніштен келген Сұңғатты таңқалдырмай қоймады. Себебі мұнда шахтаішілік көліктердің бірнеше түрі бар.
Өндіріске 22 жасымда келдім. Осы жерде менің алға қойған мақсаттарым іске асты. Тұрақты жұмысым болған соң, жоспар құрып, алға қарай ұмтылудан қорықпадым. Үйлендім, үйлі болдым. Қызметімде жетістіктерге жетіп келемін.Әлі де өз-өзімді дамытқым келеді,
Расымен де, отыз жасына дейін өмірден өз орнын тапқан азамат көпке үлгі бола алады. 2021 жыл Сұңғат үшін жақсы жаңалықтарға толы жыл болды. Тұрақты табысының арқасында үйлі болып, қоныс той мен қоса үшінші рет әке атанып, жаңа үйде шілдехана да тойланды. Әулетте үш баланың арасынан бір өзі өндіріс ошағын таңдаған ұлдарына әке-мен ана да риза.
Кейіпкеріміз ендігі кезекте ұл-қыздарының болашағы үшін өзін әлі де шыңдап, үздіксіз дамуды көздейді.
