Тараз қаласының әкімі Бақытжан Орынбеков Өңірлік коммуникациялар қызметінің алаңында баспасөз конференциясын өткізуде. Өз сөзінде Бақытжан Әмірбекұлы шаһардағы шағын және орта бизнестің даму көрсеткіштері жайлы ақпарат берді.
Қала әкімінің айтуы бойынша, 2025 жылдың қаңтар-қазан айының қорытындысымен Тараз қаласында жалпы 49 867 шағын және орта кәсіпкерлік субъектілері тіркелген. 2024 жылдың сәйкес кезеңімен салыстырғанда жаңадан тіркелген шағын және орта кәсіпкерлік нысандардың саны 5 981 бірлікке артыпты.
– Ағымдағы жылы шағын және орта кәсіпкерлікте жұмыспен қамтылған азаматтар саны 76 683 адамды құрап, өткен жылдың осы кезеңімен салыстырғанда 9,5 пайызға және өндірілген өнім көлемі 400,8 млрд теңгені құрап, 17 пайызға өсті.
Ағымдағы жылы кәсіпкерлікті қолдау мен дамытудың бірыңғай кешенді мемлекеттік бағдарламасы және «Өрлеу» бағдарламасы аясында «Даму» кәсіпкерлікті қолдау қоры арқылы Тараз қаласы бойынша 19,8 млрд теңгеге 131 жоба қаржыландырылды, – деді қала әкімі.
