ҰҚК төрағасынан тұтқынға дейін. Қамауға алынған Кәрім Мәсімов туралы не білеміз?
Еліміздегі ең ықпалды шенеуніктердің бірі, 56 жастағы Кәрім Мәсімовтің отанға сатқындық жасады деген күдікпен ұсталғаны көпшіліктің сұрағын туғызып отыр.
Кәрім Мәсімов 1965 жылы Целиноград (қазіргі Нұр-Сұлтан) қаласында дүниеге келген. Қытай, ағылшын, араб тілдерін жетік меңгерген ол Пекин тіл институтын, Ухань заң институтын, Қазақ мемлекеттік басқару академиясын бітірген. Оның экономика докторы атағы бар. Кәрім Мәсімов үкіметке ірі банк бизнесі саласынан келген. Оның екі қызы мен бір ұлы бар.
Еңбек жолын Еңбек министрлігінде бастаған Мәсімов Тәуелсіз Қазақстанның жетінші прьемер-министрі болып 2007 жылдың қаңтарында тағайындалды. Оған сол кезде Қазақстанды дамыған 50 елдің қатарына қосу туралы тапсырма берілген еді. Сондай-ақ елді дағдарыстан аман-есен алып шығуы керек болды.
Ол Үкімет отырысын тұңғыш рет қазақ тілінде жүргізген премьер-министр ретінде халық есінде қалды. Бірақ Үкімет үйіндегі барлық жиындар қазақ тілінде өтетінін айтқанымен, ол уәдесінде тұрмады.
Мәсімов Үкіметті екі рет басқарды. Бірінші рет 2007-2012 жылдар аралығында, екінші рет 2014-2016 жылдары. Екі жылдық үзіліс кезінде, яғнп 2012-2014 жылдары Президент әкімшілігін басқарды. 2016 жылдың қыркүйек айында генерал-лейтенант Мәсімов Ұлттық қауіпсіздік комитетінің төрағасы болып тағайындалды. Ол осы лауазымда 2022 жылдың қаңтарына дейін, яғни қамауға алынғанға дейін отырды.
Мәсімов комитетті басқарғанда, аса бір үлкен іспен көзге түскен жоқ. Тіпті БАҚ беттеріне де жиі шықпады. Құпия органды Кәрім Мәсімов басқарған кезде елімізде террорлық шабуылдар болмады. Бірақ есірткі каналдарының жолын кесіп, браконьерлермен күресті. Сирияда қалып қойған қазақстандықтарды «Жусан» операциясы арқылы елге қайтарды. Бұл операция ҰҚК-нің халық алдында беделін көтерді.
Сондай-ақ Мәсімов тұсында белгілі қытайтанушы, Синьцзянь университетінің құрметті профессоры, саясаттанушы Константин Сыроежкиннің іұсталғанын айта кеткен жөн. Ол тыңшылық жасады деген айыппен 10 жылға бос бостандығынан айырылды. Айтпақшы, ол Президент Қасым-Жомарт Тоқаевтың докторлық диссертациясын қорғау кезінде ғылыми кеңесшісі болған.
Спортпен шұғылданғанды жақсы көретін генерал-лейтенант 2016 жылы жаппай жүгіру кезінде аяғына екі түрлі шұлық киіп, көпшіліктің күлкісіне қалды. Сондай-ақ оның қазақшаға шорқақ екені жиі айтылып, ғаламторда қытайша жазылған студенттік билеті қоғамдық резонанс тудырды. Тіпті оның ұлты туралы да қауесеттер көбейді.
5 қаңтарды Тоқаев Мәсімовті отставкаға жіберіп, кейін Ұлттық қауіпсіздік комитетінің экс-төрағасы Кәрім Мәсімов және басқа да тұлғалар ұсталғаны хабарланды. ҚК 175-бабының 1-бөлігімен (Мемлекетке сатқындық жасау) сотқа дейінгі тергеу амалдары басталып, күдіктінің өзі тергеу қапасына қамалды. Ол енді 15 жылға дейін сотталып, ҚР азаматтығынан айырылуы мүмкін.
Жоғары лауазымдарда болып, Үкіметті екі рет басқарған Кәрім Мәсімовтің қысқаша өмірбаянынан түсінгеніміз, бүгін жылы орындықта отырған қай шенеуніктің де ертең тергеу қапасының темір кереуетінде ұйықтамайтынына еш кепілдік жоқ.
