«Кел, балалар, оқылық»: Тараздық балалар мен Қуаныш Бейсеков деректі фильм түсірді
Jusan мен белгілі қазақстандық режиссер Қуаныш Бейсековтің “Кел, балалар, оқылық” жобасы Тараз қаласында жалғасын тапты. Бұл жолы жас буын көлеңке театры негіздерін үйреніп, деректі фильм ұсынбақ.
Айта кетсек, бұған дейін “Persona J” айдарының аясында Алматы облысында бастау алған жемісті жоба бірнеше ауыл балаларын жинап, оларды режиссерлік, актерлік және операторлық шеберлікке баулыған болатын. Мұнымен қоса, жеті күнге созылған шеберлік сағаттарының нәтижесінде тәлім алушылар танымал әнші Еңліктің жаңа “Бір кім дүние” әніне бейнебаян түсірді.
“Бейнебаянды тамашалаған балалардың бойында мақтаныш сезімі оянды. Расымен де мұндай жобалардың маңызы зор. Соның арқасында қатысушылар алға аяқ басуды, өз мақсаттарына талмай жетуді үйренеді”, – деген еді Қуаныш Бейсеков жобаның нәтижесі жайлы.
“Кел, балалар, оқылық 2” аясында жобаға түрлі үйірмелерге қатысатын 20 жеткіншек іріктеліп алынды. Режиссер Қуаныш Бейсеков оларға актерлік шеберлік пен көлеңке театры негіздерін үйретті. Оқушылар безендіруден бастап, бейнероликтің сценарийіне дейін өздері жазды.
“Бұл жолы балалар мен Қуаныш деректі фильм түсірді. Жобаның қорытындысы қазан айының соңына қарай жарияланады”, – дейді Jusan өкілдері.
Осы орайда Jusan аталмыш жоба халықаралық 1-2 қазанда өткен Red Jolbors фестивалінде “Коммерциялық емес, әлеуметтік роликтер” категориясы бойынша жалғыз жүлде – қоланы жеңіп алғанын атап өткен жөн.
“Біздің басты марапатымыз — бұл жобадан кейін армандарына бірнеше қадам жақындаған балалардың эмоциялары”, – дейді Jusan өкілдері фестивальдегі жеңісі жайлы.
