Келес ауданының Бозай ауылдық округіне қарасты Тартоғай елді мекенінде биыл қарбыз маусымы сәтті басталды. Жеке кәсіпкер Жүсіпбек Әшірбековтің иелігіндегі “Жүсіпбек” шаруа қожалығы 25 гектар суармалы егістік алқапқа еккен қарбызын ерте жинауға кірісті. Заманауи агротехнология мен тынымсыз еңбектің нәтижесінде өнім жылдағыдан бір апта бұрын пісті.![]()
Тамшылатып суару жүйесін қолдану арқылы шаруа су үнемдеп қана қоймай, өнімнің сапасы мен көлемін арттыруға қол жеткізді. Қарбыздардың салмағы 15 келіге дейін жетіп, орта есеппен 10 келіні құрап отыр. Қазіргі таңда өнім жергілікті нарықта келісін 200 теңгеден саудалауда.
Шаруа қожалығы ауыл тұрғындарын да назардан тыс қалдырмай, маусымдық жұмыстарға күніне 40-қа жуық азаматты тартып отыр. Бұл ауыл тұрғындары үшін табыс табуға мол мүмкіндік, ал кәсіпкер үшін – еңбектің өнімділігін арттыратын күш.![]()
Биыл егістік алқапты шегірткеден қорғауда жергілікті әкімдік тарапынан көрсетілген қолдау ерекше рөл атқарды. Уақтылы жүргізілген залалсыздандыру жұмыстары мен жүйелі бақылау шараларының арқасында алқап қауіпсіз сақталып, мол өнім алуға жол ашылды.
— Қауіптің алдын алудағы үйлесімді әрекет пен қолдаудың арқасында бүгінгі нәтижеге қол жеткіздік. Бұл – тек менің ғана емес, бүкіл Тартоғай жұртының қуанышы, – дейді кәсіпкер.
Айта кетейік, өткен жылы 22 871 гектар жерге ауыл шаруашылығы дақылдары егіліп, өнім көлемі 70,1миллиард теңгеге орындалды. Ағымдағы жылдың 3 ай қорытындысы бойынша ауыл шаруашылығы өнімдерінің көлемі 7,6 миллиард теңгеге жетті. Былтыр жылы 1 300 гектарға алқапқа жаңбырлатып суғару жобасы іске асырылған болса, ағымдағы жылы осы бағытта 1 139 гектар жерге ендіру жоспарлануда, — деп хабарлайды Келес ауданы әкімдігінің баспасөз қызметі
