«AMANAT» партиясының «Ұлттық мұра» жобасы елдік сананың орнықты дамуына қызмет ететін, ұлтымыздың рухани тамырын тереңдететін бастама екені белгілі. Осы жоба шеңберінде партиямыз айтыс өнерінің дамуына жағдай жасап, оны ұлттық қазынамыздың өзегі ретінде қайта жаңғыртуға елеулі үлесін қосуда.
Өткен аптада Отырар ауданының 90 жылдығы шеңберінде осы аймақтың дара тұлғалары Әселхан Қалыбекова мен Көпен Әмірбектің құрметіне арналған «Омартасы рухтың – Отырарым» атты республикалық ақындар айтысы өткенін хабарлаған болатынбыз. Осы дәстүрдің ізімен бүгін Қаратау тәжіне баланған Кентау қаласының 70 жылдығына орай «Кентауым – мәуелі гүл бағым» республикалық ақындар айтысы басталды.
Қаладағы Шәмші Қалдаяқов атындағы мәдениет сарайында өткен айтыста Қызылорда облысынан – Нұрмат Мансұров пен Ержан Әміров, Шымкент қаласынан – Карима Оралова, Аян Ниязбек, Нұрмахан Жақыпбек, Алматы қаласынан – Шұғайып Сезімхан мен Нұрзат Қару, Астана қаласынан – Нұртілеу Төленбек, Қарағанды облысынан – Дидар Қамиев, Павлодар облысынан – Исламхан Мұхамедхан өнер көрсетті. Айтыс аламанында Түркістан облысының жыр сүлейлері – Бекарыс Шойбеков, Дәурен Ақсақалов, Нұрдәлет Өмірбек, Ахметрасул Баянбай, Шахмардан Бекарысұлы көрермендерді рухани қуатқа бөледі. Жыр додасында жас ақын Жанарыс Ибадулла Кентау қаласының атынан шығып, қала тұрғындарының ыстық ілтипатына бөленді.
Айтыс ақындары мен көрермендерге деген зор құрметін Кентау қаласының әкімі Жандос Тасов, «AMANAT» партиясы Түркістан облыстық филиалы атқарушы хатшысының орынбасары, облыстық Әйелдер қанатының жетекшісі, Түркістан облыстық мәслихатының депутаты Қалыйма Жантөреева жеткізді.«- Кентау өндіріс пен еңбектің қаласы, руханият мен мәдениеттің ордасы. Қаламыз өзінің 70 жылдық тарихында ғасырға бергісіз даму жолынан өтті. Осы өңірден елге белгілі тұлғалар, өнер мен білімнің саңлақтары шықты. Соның бірегейі – биыл туғанына 80 жыл толған дарабоз композитор Сейдолла Байтереков болатын. Даланың дара таланты жазған «Әлия» әніне биыл 50 жыл толды. Бұл ән музыка әлеміне ғана емес, бүкіл қазақ халқына көп нәрсе берді. Қазақ халқының рухын көтерген ән болатын. Осы әннің арқасында қыздарымызға бұл есімді қою кеңінен тарады. Ең бастысы, «Әлия» кеңестік байқауларда орындалып, осындай биікке жеткен тұңғыш қазақ әні болатын. Сейдолла Байтереков туған жерде, оның төл қаласының мерейтойы аясында республикалық ақындар айтысының өтуін жақсылықтың нышаны деп білеміз. Ақындарға толағай табыс, шығармашылық кең өріс тілеймін», — деді Қалыйма Жантөреқызы.
Сахна төріне шыққан ақындар өнерін белгілі айтыскер ақын, Қазақстан Республикасының Мәдениет қайраткері Әбілхайыр Сыздықов бастаған қазылар алқасы бағалады. Алқа құрамына танымал айтыскер ақын, Қазақстан Республикасының Мәдениет қайраткері Ақмарал Леубаева, ақын, мәдениет саласының үздігі Бекмұрат Анарбаев, ақын, Қазақстан Республикасы Журналистер Одағының мүшесі Ләззат Сарыбаева, белгілі айтыскер ақын, Қазақстан Республикасының Мәдениет қайраткері Бөрібай Оразымбет енді.Жыр сүлейлерінің додасын «Айтыс ақындары мен жыршы-термешілердің халықаралық одағы» РҚБ Түркістан облыстық филиалының төрағасы, белгілі айтыскер ақын, мәдениет саласының үздігі Тұрар Тлеулиев жүргізді.
Көрермен көңілінен шыққан айтыс барысында ақындар замана тынысын жырмен өріп, қоғамдағы өзекті мәселелерге көңіл мен көкірек көзімен үңілді. Ақындар шырқаған әрбір шумақтан елге деген сүйіспеншілік, ұлт рухы сезіліп тұрды. Қазылар алқасының шешімімен «Кентауым – мәуелі гүл бағым» республикалық ақындар айтысының жеңімпаздары төмендегіше анықталды:
Бас жүлде – Бекарыс Шойбеков – 1 000 000 теңге1-орын -Нұрмат Мансұров– 700 000 теңге2-орын – Ақмарал Леубаева – 600 000 теңге2-орын – Дидар Қамиев – 600 000 теңге3-орын – Нұрдаулет Өмірбекұлы – 500 000 теңге3-орын – Даурен Ақсақалов – 500 000 теңге3-орын – Шұғайып Сезімхан – 500 000 теңге3-орын – Нұрзат Қару – 500 000 теңге сыйақыға ие болды.Қалған қатысушылардың барлығына 400 мың теңгенің сертификаты табысталды.
«AMANAT» партиясы Түркістан облыстық филиалының баспасөз қызметі
