gov.kz
https://turkystan.kz/article/266390-kitap-oqityn-ult-zobasyna-qostanai-oblysy-da-qatyspaq
Қостанай облысының әкімі Құмар Ақсақалов бүгінде елімізде екі аймақта басталған «Кітап оқитын ұлт» пилоттық жобасына Қостанай облысы да атсалысатынын мәлімдеді, деп хабарлайды turkystan.kz.
Облыс әкімі бала кезден кітап оқу дағдысына баулу өте өзекті мәселеле екенін баса айтты.
«Баршаңызға мәлім Мемлекет басшысы Қасым-Жомарт Тоқаев Атырауда өткен ІІІ Ұлттық құрылтайда сөйлеген сөзінде прогрессивті ұлтқа айналу үшін кітапты бала кезден бастап оқуға дағдылану қажеттігін атап өтті.
Бұл – расында өзекті мәселе.
Жақында ҚР Парламенті Мәжілісінің Төрағасы, «AMANAT» партиясының Төрағасы Ерлан Жақанұлы Қошанов «Кітап оқитын ұлт» пилоттық жобасы бастау алғанын жариялады.
Аталған жоба өтетін аймақтар тізімінде Қарағанды облысы мен Шымкент қаласымен қатар біздің өңірдің де болуы қуантады және ол заңдылық деп білемін», – деді Қ.Ақсақалов.
Аймақ басшысы бұл жобаға Қостанай облысының да қуана атсалысатынын мәлімдеді.
«Өз даласында Ыбырай Алтынсарин, Ахмет Байтұрсынұлы, Міржақып Дулатұлы сынды ұлы тұлғаларды тербеген қасиетті Қостанай облысында халқымыздың зейінін ашып, білімін шыңдауға бағытталған ауқымды жобаның өтуі орынды.
Жобаның мақсаты – қоғамда кітап оқу мәдениетін қалыптастыру және кітап оқуға деген қызығушылықты арттыру.
Жоба мектеп оқушылары, колледж және университет студенттері, педагогтер, отбасылық әулеттер мен мемлекеттік қызметшілердің әр қайсысының санатына сәйкес «Кітап оқитын мектеп», «Кітап оқитын колледж», «Кітап оқитын университет», «Кітап оқитын педагог», «Кітап оқитын әулет» және «Кітап оқитын мемлекеттік қызметкер» аталымдары бойынша байқаулар сериясынан тұрады», – дейді облыс әкімі.
Байқау қатысушылары 15 кітаптан оқып, өз бағыты аясында түрлі сайыстарда бақ сынайтын болады.
Бұдан бөлек, мектептерде оқырмандар клубтары құрылып, әр оқылған кітапты талқылау кештері өтпек.
Байқау жеңімпаздары қомақты қаржылай сыйлықпен марапатталады.
Жоба «AMANAT» партиясының қолдауымен, «Кітап оқитын ұлт – читающая нация» Қоғамдық қорымен бірлесе жүзеге асырылады, ал жобаның басты демеушісі – «ALAGEUM ELECTRIC» компаниясы.
«Құрметті достар! Бұл жоба әр бір оқырманның сыни ойлауын, ой-өрісін және зияткерлік әлеуетін дамытуға үлес қосатынына сенімдімін.
Кітап – түбі шексіз алтын сандық. Ендеше білім әлемінің байлығына бірге ентелей енуге шақырамын.
Барлық байқау қатысушыларына сәттілік тілеймін!», – деді аймақ басшысы.
Еске сала кетейік, жобаға қатысушылар жауапты министрліктер мен түрлі сала сарапшыларының қатысуымен іріктелген 15 кітапты оқуы тиіс. Мысалы, 6–10 сынып оқушылары үшін әр сыныпқа бөлек 15 кітаптан, жалпы 75 кітап ұсынылды. Бұл тізімге «100 кітап» жалпыұлттық сауалнамасында іріктелген 100 шығарманың 43-і енді. Жалпы жобада қазақ тілінен 150, орыс тілінен 150 кітап бар. Партия байқауының жеңімпаздары әр аталым бойынша қомақты қаржылай сыйлыққа ие болады.Пилоттық жоба аясында үш аймақта 100 мыңнан аса адамды қамту жоспарланып отыр. Келер жылы жоба еліміздің барлық аймағында жүзеге асырылады.
Толық нұсқасына гиперсілтеме беруді ұмытпаңыз: https://turkystan.kz/article/266390-kitap-oqityn-ult-zobasyna-qostanai-oblysy-da-qatyspaq
