Конго-Қырым геморрагиялық қызбасы – бұл аса қауіпті жұқпалы ауру, тоқтаусыз қан кетумен, жоғары өліммен сипатталады, яғни медициналық көмекке уақтылы жүгінбесе, науқас өліп кетуі мүмкін.
КҚГҚ вирусының негізгі тасымалдаушылары – иксод кенелері.
Инфекцияны жұқтыру қаупі жоғары тұлғалар:
- табиғи ошақ аумағында жануарларды күтумен, сондай-ақ оларды союмен немесе бөлшектеумен айналысатын тұлғалар;
- эндемиялық аймақта болған кезде жұқтырған кенемен байланыста болған кез-келген тұлғалар;
- КҚГҚ-сын жұқтырған науқастың қанымен және басқа да дене сұйықтықтарымен қорғалмаған байланысы бар медицина қызметкерлері.
Табиғатта демалу кезінде өзіңізді КҚГҚ инфекциясынан қорғау үшін қарапайым ережелерді сақтауды ұсынамыз:
— табиғатқа шыққан болсаңыз, ұзын жеңді, шұлықтың ішіне салынатындай ұзын балақты шалбармен ашық түсті киім киген жөн. Қосымша, жәндіктерді үркітетін препараттар (аэрозоль, репелленттер) қолдануға болады;
— мал бағу және қырқын жүргізетін орынды, онымен қоса малды алдын ала кенеге қарсы дәрі-дәрмектермен залалсыздандыру қажет;
— мал күтімімен айналысқанда жоғарыда айтылған қорғаныс киімдерін киген жөн, малды кенеден тазартқанда және малдың жүнін қырққанда қосымша қолғап киіп, беттің ашық жерлерін бет пердемен жауып, қорғаныс көзілдірігін кию қажет;
— барлық айтылып кеткен жағдайда, киімге жабысқан кенені уақтылы байқау үшін, белгілі бір уақыт аралығында киіміңіздің үстін өзіңіз немесе бір-біріңіздің киімдеріңіздің үстін қарап тұру қажет;
— егер Сіз КҚГҚ-мен ауырған науқаспен қарым қатынаста болсаңыз немесе терінің ашық жеріне кене жабысқанын байқасаңыз, әсіресе шырышты қабыққа кененің қаны жағылған болса, Сізге тез арада медициналық мекемеге көмекке жүгіну қажет.
Есіңізде болсын, қауіпсіздік шараларын сақтау, кене шаққан жағдайда медициналық көмекке уақытылы жүгіну, дер кезінде алдын алу және емдеу аурудың алдын алуға және де оның қолайлы нәтижесіне ықпал етеді!
Жамбыл облысының санитариялық-эпидемиологиялық бақылау департаментінің басшысы – Байділда Шиналиев
