Халқымыздың тарихына таңба басылғандай қиын сәттерді де бастан кешірудеміз. Иә, бәрімізге белгілі, бұл күндері еліміз бойынша лаңкестерге қарсы операциялар әлі де жалғасын тапса, облыс орталықтары мен Алматы мен шымкент сияқты ірі мегаполистердің тыныс-тіршілігі ақырындап болса-дағы бұрнағы қалпына ене бастады. Дегенмен, бұл оқиғалардан алатын сабақ өте көп. Оның бастысы, еліміздегі ішкі тұрақтылық қағидаттарына қайта үңіліп, халықтың әлеуметтік-тұрмыстық ахуалына жаңаша қырдан қарау мен ел арасындағы идеологиялық үгіт-насихат жұмыстарының көлемін ұлғайту керек сияқты.
Еліміздегі оқиға көрсеткендей, кез келген бейберекетсіздікті өздерінің түпкі мақсатына шебер пайдаланатын теріс пиғылды топтар мен радикалды діни
ағымдардың қарасы көптігін және олардың алаңсыз жатпағанын да осы күндердегі қайғылы жайттар жайып салып отыр.
Сондықтан, біздің ендігі басты міндет – идеологиялық тәлім-тәрбиені күшейту мен жастарды отансүйгіштікке тәрбиелеу болып саналуы тиіс. Себебі, арандатушылар мен террористік ұйымдардың арбау сөзіне сеніп, жетегіне ілескен көпшіліктің басым қарасы – жастар қауымы. Ал, біздер жастарды Отанымыздың болашағы деп танитынымызды ескерсек, олардың әлдекімдердің артынан еруі – өте қауіпті құбылыс. Біз оны осы қайғылы оқиғалар желісінен көріп, танып отырмыз.
Мен жерлестерімді еліміз үшін қиын сәттерде барынша қырағы болуға, арандатушылық іс-әрекеттерге ұрындыратын бейресми мәліметтерге сенбеуге шақырып, Қазақстанның қарыштау сәттері алда екеніне сендіргім келеді.
Ғалымжан Мамырбаев, No9 Меркі колледжінің директоры, аудандық мәслихаттың депутаты.
