Қала әкімі Ержан Жылқыбаев Тараздағы бірқатар әлеуметтік нысанды аралап, жұмысымен танысты.
Шаһар басшысы алдымен «Мейірім» медициналық орталығында болды. «Мейірім» облыстағы халықаралық стандарттар бойынша жұмыс істейтін жалғыз медициналық орталық. Онда терапиялық, хирургиялық, акушерлік-гинекологиялық көмек және диагностикалық қызметтер көрсетіледі. Орталықтың өзге стационарлар мен емханалардан ерекшелігі, онда сәулелік диагностиканың (магниттік-резонанстық және компьютерлік томография) барлық түрлері бар. Тәуліктің кез келген уақытында амбулаториялық кабинетте түрлі ем қабылдауға болады.Медициналық орталықтың жұмысымен танысқан Е.Жылқыбаев тұрғындарға жедел әрі сапалы қызмет көрсетіп жатқан қызметкерлерге алғысын білдіріп, жұмыстарына сәттілік тіледі.
Бұдан кейін қала әкімі шаһарда жаңадан бой көтеріп жатқан «Taraz towers» тұрғын үй кешенінің құрылысымен танысты.
Абай даңғылы мен Қапал көшесінің қиылысында орналасқан көпқабатты тұрғын үйдің бас жобалаушысы — «Archiline LTD» ЖШС-ы. Жоба бойынша 12 қабатты заманауи тұрғын үйдің ауласында демалыс, спорт, балалар алаңдары мен автотұрақ болады. «Taraz towers» кешені алдағы үш жылда пайдалануға беріледі деп күтілуде. Құрылыс жұмыстарымен танысқан шаһар басшысы бірінші кезекте сапаға мән беру қажет екендігін айтып, бұл мәселе қатаң қадағалауда болатынын ескертті.
Мұнан соң шаһар басшысы С.Нұрмағамбетов атындағы №10 орта мектепте болып, материалдық-техникалық базасымен және білім сапасымен танысты.
Бүгінде 744 орынды мектепте 1748 оқушы үш ауысымда білім алуда. Оқушы орны тапшылығы мәселесін шешу үшін мектеп ғимараты жанынан 300 орынды жаңа білім нысанын салу жоспарлануда. Осы жерде мектеп бітіруші түлектермен жүздескен қала әкімі оларға алдағы ұлттық бірыңғай тестілеу сынағында сәттілік тіледі.
Сондай-ақ Е.Жылқыбаев Сүлейменов көшесінің соңында орналасқан бес қабатты 6 тұрғын үйдің құрылысымен де танысты. «Жұмыспен қамту жол картасы» бағдарламасы аясында жүргізіліп жатқан құрылыс жұмыстары биыл аяқталып, пайдалануға беріледі деп жоспарлануда.
Қала басшысы мердігер компания «Бином» ЖШС-ының өкілдеріне сапаға мән бере отырып құрылыс жұмыстарын белгіленген мерзімде аяқтауды тапсырды.
Тараздықтар тарапынан әлеуметтік желілерде азық-түлік бағасының тіпті әлеуметтік дүкендердің өзінде қымбаттығы туралы шағымдар айтылып жүргені жасырын емес. Осыған орай шаһар басшысы жұмыс сапарының соңында Тараздағы әлеуметтік дүкендердің біріне кестеден тыс кіріп шықты.
Ондағы тауарлар бағасының нарықтағы бағадан төмен екендігіне көз жеткізген қала әкімі бағаның тұрақтылығы тиісті мекеме мен әкімдік тарапынан бақылауда болатынын айтты.
