Баузақ ауданында білім нысандарының құрылысы, қайта жаңғырту және күрделі жөндеуге қомақты қаражат бөлінген. Бұл туралы Байзақ ауданының әкімі Рахматілдә Рахманбердиев аудандық мәслихат депутаттары алдында берген есебінде мәлімдеді, – деп хабарлайды «shanyraqinfo.kz» ақпарат агенттігі.
Атап айтқанда, Ақшолақ ауылындағы 120 оқушыға арналған орта мектеп құрылысы (сметалық құны 564,2 млн. теңге) 2018 жылы басталып, нысан құрылысы биыл тамыз айында аяқталады.
Базарбай ауылындағы А.Пушкин орта мектебі, Аққия ауылындағы «Аққия» бастауыш мектебі, Көктал ауылындағы «Саялы» балабақшасы, Жетібай ауылындағы «Ерасыл» балабақшасы қазандықтарын газға көшіру құрылыстары жүргізілуде. Жалпы сомасы 165,2 млн. теңге.
Қазіргі таңда, аудан бойынша 5 мектеп күрделі жөндеу жұмыстарын қажет етеді. Бүгінге олардың 3-еуін күрделі жөндеуге ЖСҚ дайындалып, облыстық бюджеттен қаржыландыруға бюджеттік өтінім ұсынылды (Ш.Уәлиханов — 269,4 млн. теңге, Абай — 248,6 млн. теңге, Н.Гоголь — 292,6 млн. теңге).
Ал, Түймекент, Бурыл орта мектептерінің күрделі жөндеу жұмыстарына жобалық-сметалық құжаттамаларын әзірлеуге жергілікті бюджеттен 9 млн. 398 мың 376 теңге қарастырылды. Бүгінгі таңда, мемлекеттік сатып алу жұмыстары жүргізілуде. Нәтижесі ағымдағы жылдың тамыз айының соңына шығады деп жоспарлануда.
Сол секілді, спорт саласында дене шынықтыру және спортпен жүйелі түрде шұғылданушылар үлесі жалпы халықтан 29,8% құрап отыр (меже 29,7), бұл көрсеткіш 2018 жылмен салыстырғанда 1379 адамға ұлғайған.
Ауданның мәдени өмірін қалыптастыру бағытында да ауқымды жұмыстар жүруде. Мысалға, аудан бойынша 1 аудандық мәдениет үйі, 20 ауылдық клубтар, 1 аудандық орталық, 1 аудандық балалар, 23 ауылдық кітапхана, 1 аудандық тарихи-өлкетану музейі тұрғындарға мәдени қызмет көрсетуде. 2018 жылы шалғай елдімекендердегі тұрғындарға мемлекеттік қызметтердің қолжетімділігін арттыру мақсатында 8 ауылдан ақпараттық орталық, аудандық орталық кітапханадан коворкинг (білім орталығы) орталығы ашылды. Сонымен қатар, 2019 жылға 8 ауылдан осындай орталықтар ашылуы жоспарланып, оған бюджеттен 5 млн. теңге қаржы бөлініп, қажетті құрал-жабдықтар толығымен алынды. Жоспарланған 8 ақпараттық орталықтың І жартыжылдықта барлығы 8 (Амангелді, Байзақ, Жетібай, Кеңес, Үлгілі, Көктал, Аймантөбе, Тегістік ауылдық кітапханаларында) ашылды.
Ал, тіл саласы бойынша облыс әкімдігі тілдерді дамыту басқармасы мен аудан әкімдігі арасында аудан бойынша көрнекі ақпараттағы мемлекеттік тілдің қолданылуы жыл соңына дейін 100 пайызға орындау меже қойылған. ІІ тоқсанға 90 пайызға жету жоспарланған. Орындалуына тоқталсақ, 307 нысан зерделеніп, оның 286 нысан заң талаптарына сәйкес болып, 93,1 пайызға орындалды. Жыл соңына дейін аудан бойынша елдімекендердегі көшелерді жаңа үлгідегі аншлагтармен 100 пайыз қамту жоспарлануда. Ауданда барлығы 441 көше бар, оның 286 көшесі, жаңа үлгідегі аншлагпен қамтылып, 65 пайызды құрап отыр. Оған 2 млн. 142 мың теңге жұмсалды.
