Публицист, ғалым, ағартушы, қазақ халқының мақтанышы, ұлт тұлғасы Әлихан Бөкейханның туылғанына 155 жыл толуы елімізде кеңінен аталып өтуде.
Сондай іс-шараның бірі жақында ақиық ақын М.Мақатаев атымен аталатын мектепте өткізілді. Өзге ұлт өкілдеріне мемлекеттік тілді үйрететін маман ретінде өзге ұлт балаларына мемлекеттік тілді меңгертіп қана қоймай ,сонымен бірге салт-дәстүрімізді, әдебиетіміз бен тарихымызды, тұлғаларымыз туралы да мол мағлұмат беріп, насихаттауға тырысамыз.
Көп қырлы талант иесі Әлихан Бөкейхановтың жазба мұралары аз емес. Бар өмірі халық қамын ойлаумен өткен қайраткердің қанатты сөздеріндегі тәуелсіздік тағылымы туралы «Әлихан Бөкейхан және тәуелсіздік тағылымы» атты тәрбие сағатының Алаш қайраткерлерін еске алу мен олардың мұраларын өскелең ұрпаққа насихаттауда берері мол болды десек артық айтқандық емес. Ұлттың қамын ойлап, басын бәйгеге тігіп күрескен азаматтың әр кездегі, әр жылдары айтқан қанатты қағидаттарының да бүгінгі жас ұрпақ үшін, тәуелсіз қазақ елі үшін берер ғибраты мол екені даусыз. Тәрбие сағатының мақсаты — қайраткер тұлғаның ел, жер, тіл тағдыры жайындағы тебіреністері төңірегінде ой сабақтау болды.
Ә.Бөкейхановтың «Бостандыққа апаратын жалғыз жол — ұлттық ынтымақ қана» деген пікіріне үңіліп қарасақ, ХХ ғасырдың басында қай жолмен жүрерін білмей аңырап тұрған қазақ халқын бостандыққа апаратын жалғыз жол — ынтымақ еді, ал енді өз тәуелсіздігіміздің отыз жылдығын тойлап жатқан бүгінгі азат заманда да ынтымақ керек. Ұлт Көшбасшысы, Тұңғыш Президентіміз Н.Назарбаевтың «Ел бірлігі — ең асыл қасиет» деген даналық сөздерінің рухани үндестігі ынтымықтың қандай рөл атқаратынын айғақтап тұр. «Елдің тұрмысын, тілін, мінезін білмеген кісі көш басын да алып жүре алмайды» деген ой айтады Ә.Бөкейханов.
Тәуелсіздікке қол жеткізген халқымыздың бодандық қамытын сілкіп тастап тарих аренасына шыққан қазақ халқы күш-қуаты мен ақыл-парасатына нық сеніп,өмір бәйгесінің алдыңғы сапында тұруға хақысы бар.
«Жер тағдыры — ел тағдыры» сан рет айтылған екендігі ақиқат. Ә.Бөкейханов қай биікте жүрсе де жер тағдыры үшін тынымсыз күрес жүргізді. Ә.Бөкейхановтың «Жер десе – дірілдемей болмайды, жер мәселесі — өмір сүру мәселесінің зоры» деп айтқаны бүгінгі күні де өзектілігін жоғалтқан емес.Ата-бабаларымыздың қасық қаны қалғанша күресіп алып берген автономиясы 1991 жылы Тәуелсіздіктің қарлығашы болып қолымызға қонды. Бұл күндері «мың өліп, мың тірілген» қазақ халқы әлем халықтарымен терезесі тең. Бостандығын баянды ету жолында биікке ұмтылған, Тұңғыш Президентіміз Н.Назарбаевтың сарабдал саясатының нәтижесінде мұхиттың арғы жағына дейін даңқымыз кеткен, алыс-жақын елдермен санасатын салиқалы мемлекетпіз.
Өскелең жас ұрпаққа тәуел-сіздік жолында аянбай тер төккен Алаш азаматтарының еңбегін насихаттау — біздің міндетіміз. Тәуелсіздігіміз ұзағынан болғай!
Жанар АҚБЕРДИЕВА,
М.Мақатаев атындағы тірек орта мектебінің мұғалімі
