Алматы қаласындағы мектептердің бірінде бастауыш сынып оқушыларын ұрған мұғалімнің әрекеті желі қолданушылардың наразылығын тудырды, деп жазды turkystan.kz.
Instagram-дағы zhaloba_shkola_almaty парақшасына бейнежазба жүктеген ата-аналар құзырлы органдардың бұл оқиғаға назар аударуын сұрайды.
«Бұл – Алматы қаласындағы «Бәйтерек» мектебі. Мүғалімге 2-сынып оқушыларының жаттығу жасағаны ұнамаған. Ол ұлдарды тақтаға шығарып, жазалап жатыр. Ал 8 жасар менің баламның басын тақтаға соқты. Психологиялық қысымға ұшыраған оқушылардың ертеңі не болады?» – дейді жазба авторы.
Автордың айтуынша, мектеп әкімшілігі ата-анадан да, таяқ жеген баладан да кешірім сұрамаған. Ал ол аздай, мұғалім жұмыстан да шығарылмаған.
Қазір ата-аналар «Бәйтерек» мектебінің оқушыларын жазалаған мұғалімді жауапқа тарту мақсатында қол жинап жатыр.
https://turkystan.kz/article/164166-mugalim-ekinshi-synyp-okushysynyn-basyn-taktaga-sokty-video/
