Мемлекеттік тілдің қолдану аясын кеңейтуді көздеген «Мәміле» пікірталас клубы өңірімізде жүйелі түрде жүзеге асуда. Маңызы айқын жоба биыл да түндігін түріп, қатысушылар легіне алғашқы дәрісін өткізді. Достық үйінде өткен клуб жұмысының әуелгі тақырыбы «Отбасы – бақыт мекені» деп аталды. Берері мол жиында облыстық ҚХА Ақсақалдар кеңесінің төрағасы Асқарбек Сейілхан және «Қоғамдық келісім» КММ жобаларды іске асыру және құрылымдармен жұмыс бөлімінің басшысы Аққу Қаратаева қатысушыларға сәттілік тілеп, жобаның ауқымы жыл арта кеңейіп келе жатқандығын алға тартты.
Шарада тіл жанашыры, филология ғылымдарының кандидаты, Халықаралық ақпараттандыру академиясының академигі, Қазақстан жазушылар, журналистер одағының мүшесі, Шерхан Мұртаза атындағы Халықаралық Тараз университетінің профессоры Меңдібай Әбілұлы «тіл тазалығы – ең қымбат қазына» дей келе, жастарды ана тілді қоспа сөздермен шұбарламауға шақырды.
Одан соң облыстық ҚХА Аналар кеңесінің мүшесі, М.Х.Дулати атындағы Тараз университетінің Аналар кеңесінің төрайымы Ардақ Жантаева қоғам үшін 5 әлеуметтік кеселді қамтыған «Салауатты сана» жобасы аясында қатысушыларға мардымды ақпараттар беріп өтті.
Биыл елімізде Ұлы Жеңістің 80 жылдығы, сондай-ақ, Кеңес Одағының батыры Бауыржан Момышұлының туғанына – 115 жыл.
Жастардың бойына патриотизм мен отансүйгіштік қасиеттерді қалыптастыруға ықпал ету – жоба жұмысының бір бағыты. Осы мақсатта Ардагерлер және Ақсақалдар кеңесінің мүшесі, облыстық қарашай-балқарлар этномәдени бірлестігінің белсенді өкілі Исмайл Хаджимуратов және «Ерекше тәуекелді солдаттар» қоғамдық бірлестігі саяси бөлімінің бастығы Сейтхан Қуантаев сөз алып, мемлекеттік тіл – қазақстандық патриотизмнің негізін қалаушы факторларының бірі екендігіне тоқталды.
Жиын соңында «Анаға тағзым орталығының» психолог маманы Аида Назымбекова клуб қатысушыларына «Отбасы – өмір аясы» тақырыбында инфосабақ жүргізді.
