«Мұндай шектеу – абсурд». Белгілі журналист былапыт сөздер үшін айыппұл салу туралы заңға наразылық білдірді

Боқтық сөзге салынған тыйым Мұхтар Түменбайды ойландырып қойды. Жазушы-журналист бұл бастаманы “таяқтың екі ұшы бар” дегенге келтірді, деп хабарлайды Stan.kz ақпарат агенттігі.

©instagram.com/mukhtartumenbayev

“Бір жағынан дұрыс шешім секілді. Әзілді ысырып қояр болсақ қоғамдағы адамдар арасындағы жанжалдардың тең жартысы абайсыз не қасақана айтылған боқтықтан басталады. Мысалы біреу әкеден боқтайды, екіншісі шешесіне тіл тигізеді. Не үш әріпке барып қайт деп жібереді. Содан барып өкпе, төбелес, пышаққа не қаруға жармасу басталады. Аяғында екі жақтың бірі соққыға жығылады, не одан да сорақысы – мерт болады. Кемінде араздасып тынады адамдар. Өтірік пе? Осы тұрғыдан қарағанда оң шешім бе дейсің.

Ал, екінші жағынан, біздің қоғамда ішке ашу толғанда оны бір боқтап шығару, сөйтіп шер тарқату  әбден бойға сіңген әдет болған. Одан арылу керек те шығар. Бірақ өмір сүру, эмоциямен күресудің құралына айналған бұл әдеттен адамдар оңайлықпен құтыла қояр ма екен? Әлемде боқтамайтын ұлт бар ма жалпы? Меніңше, мұндай шектеу орнату – абсурд”, – деп жазды ол өзінің Facebook-тегі парақшасында.

Сондай-ақ жазушы заңның әлі де жан-жақты сараланбағанын алға тартты.

“Үшіншіден, боқтық айтқан адамға 69 мың теңге айыппұл салынады дейді. Солай-ақ болсын. Бірақ бұл жерде нақты анықтамалар қажет. Егерде адам белгілі бір азаматқа қаратып боқтайтын болса, оған жаза қолдану орынды. Ал егерде адам ешкімге нақты айтпай, белгілі бір жағдайға байланысты, айталық, тайғақ көшеде тайып құлап боқтаса немесе ДТП-ға түсіп бір жерін зақымдап боқтық сөз айтса, оған да айыппұл сала ма? Не деген идиотизм.

Құрметті қадірден жұрдай, заң шығарушы мырзалар. Сендер осы не шегесіңдер заң қабылдарда? Не болса да бастарың жазылғанда осы нәрселердің аражігін нақтылап ажыратып берсеңдер”, –делінген жазбада.

https://stan.kz/mynday-shekteu—absurd-375939/