Бүгін аудан әкімінің орынбасары Ерлан Ермағанбетов Жамбыл облыстық тарихи-өлкетану музейінің бөлімі Сарысу аудандық Т.Мақашев атындағы тарихи-өлкетану музейін аралады. Музей қорында 5000-ға жуық жәдігер бар. Мұражайдың жұмыстарымен танысқан Ерлан Дайрабайұлы оң бағасын беріп, алдағы уақытта да музейдің көне жәдігерлермен толыға түсетіндігіне сенім білдірді.Аталмыш мекеме 1978 жылы Сарысу ауданының құрылғанына 50 жыл толу қарсаңында ашылған болатын.Бүгінгі күні Сарысу аудандық Т.Мақашев атындағы тарихи-өлкетану музейінде «Көне дәуір» залы, «Ықылас Дұкенұлы»залы, «Табиғат» залы, «Ұлы Отан соғысынынан кейінгі кезең». «Этнография», «Мәдени ағарту және өнер» залдары халыққа қызмет көрсетуде.
Жалпы, мұражайды ауданның тамырлы тарихынан сыр шертіп тұр деуге болады. Кеңес өкіметі тұсында ауданымыздың қалай құрылғаны, аудан халқының қиын кезеңдер ашаршылық, саяси қуғын-сүргін, Ұлы Отан соғысы жылдарындағы бастан кешкен қайғы-қасіреті, жанқиярлық ерліктері және еңбектерімен осы мұражайда толық танысуға толық мүмкіндік бар. Сондай-ақ, туған жері, елі үшін еңбек еткен айтулы тұлғалар жайлы деректер, ел ішінен жиналған бағасы алтыннан қымбат жәдігерлер өткен күндердің белгісі мен көзіндей боп тұр. Бір қуанарлығы мәдени құндылығын жоғары жәдігерлер мен сан алуан тарихи құжаттардың молдығы болып отыр.
Мұражайды аралап, танысқанда аудан шежіресімен танысқандай күй кешесің. Ауданымыздың тарихы, ауыл-аймақ, елді мекендеріміздің орналасқан жер картасы, көрнекі орындар, қыл қалам шеберлері салған суреттер, аң, құс бейнелері, Күлтөбедегі табылған дүниелер көзге жылы ұшырайды. Сондай-ақ, 1941-1945 жылдары аралығында Отан үшін от кешкен азаматтарымыздың, тылда еңбек еткен ерлер мен аналар, балаларға арнап арнайы бұрыштар ашылған. Ұлы күйші Ықылас Дүкенұлының өмірі, шығармаларына арналған деректер де мол.