ҚР Парламенті Мәжілісінің депутаты Мұқаш Ескендіров Жуалы ауданына жұмыс сапарымен келіп, өңірде жүзеге асырылып жатқан инфрақұрылымдық жобалардың барысымен танысты. Сапар барысында халықтың тұрмыс сапасын арттыруға бағытталған маңызды жобалардың бірі – елді мекендерді табиғи газбен қамту жұмыстарына ерекше назар аударылды.
Мәжіліс депутаты Билікөл ауылдық округіне қарасты Қарабастау ауылының тұрғындарымен кездесіп, елді мекеннің табиғи газбен қамтылу жағдайын көзбен көрді. Ауыл тұрғындары үшін бұл жоба әлеуметтік жағдайды жақсартуға, тұрмыстық шығындарды азайтуға және өмір сүру сапасын арттыруға үлкен мүмкіндік беріп отыр.
Аудан тұрғындарының әл-ауқатын жақсарту мақсатында жүйелі жұмыстар жүргізілуде. Қазіргі таңда Жуалы ауданында 49 елді мекен толықтай, яғни 100 пайыз табиғи газбен қамтылған. Бұл – мемлекет тарапынан өңірлерді дамытуға бағытталған нақты әрі нәтижелі саясаттың айқын көрінісі.
Билікөл ауылдық округіндегі кварталішілік газ тарту жүйесінің құрылысы кезең-кезеңімен жүзеге асырылған. Атап айтқанда, 2024 жылы құрылыс жұмыстарын «Париев» жауапкершілігі шектеулі серіктестігі жүргізсе, 2025 жылы бұл жұмыстарды «Құрылыс–2015» жауапкершілігі шектеулі серіктестігі жалғастырды.
Жоба аясында округ аумағындағы 314 аула табиғи газ желісіне қосылып, 1626 тұрғын көгілдір отын тұтыну мүмкіндігіне ие болды. Бұл ауыл тұрғындары үшін тұрмыстық қолайлылықты арттырып қана қоймай, экологиялық жағдайдың жақсаруына да оң әсерін тигізбек.
Кездесу барысында Мәжіліс депутаты атқарылып жатқан жұмыстардың маңыздылығын атап өтіп, өңірлерді газдандыру – халықтың өмір сүру сапасын арттырудағы басым бағыттардың бірі екенін айтты. Алдағы уақытта да ауылдық елді мекендерді дамытуға бағытталған жобалар кезең-кезеңімен жалғасатынын жеткізді.
