Қаламыздағы «Азиада» бөбекжай бақшасында осы жолдардың авторының ұйымдастыруымен «Адал азамат — біртұтас тәрбие» бағдарламасы шеңберінде «Тәуелсіз елдің ұлағатты ұстаздары» атты аталмыш мекеме педагогтары арасында байқау өтті. Оған «Желтоқсан желі» және «Тәуелсіздік» атты екі топ қатысып, өзара бақ сынасты.
Байқауда ел Тәуелсіздігі, Желтоқсан құрбандары, балаларға патриоттық тәрбие беру, ұлттық құндылықтарды дәріптеу секілді маңызды мәселелер қамтылды.
Төрт кезеңнен тұрған сайысқа екі топ та тыңғылықты дайындалғандарын көрсетті. Таныстыру кезеңінде өз топтарын әуезді әнмен таныстырған топ басшылары әсем әнді бимен жалғастырып, көпшілікті бір серпілтіп тастады. Ал, өнер көрсету кезеңінде сахна төрін әнге бөлеп, тыңдармандар көңіліне шуақ құйғаны сезілді.
Қойылым көрсету кезеңінде еліміздің азаттық жолындағы қиын кезеңі мен Тәуелсіздік алғаннан кейінгі жарқын өмірі шынайы бейнеленіп, кімге де болса, үлкен ой салды. Сұрақ-жауап кезеңінде қойылған сауалдарға мүдірмей жауап берген екі топ мүшелері өз білімдерін көрсете білді.
Сайыс соңында аудандық білім бөлімінің әдіскері Гүлнар Аязбаева мен бөбекжай бақша меңгерушісі Ләйлә Байходжаева байқауға қатысушы топтардың өнерлеріне ризашылық білдіріп, балалармен арадағы жұмыстарына сәттілік тіледі.
Әділ қазылар шешімі бойынша бірінші орынды «Желтоқсан желі» тобы жеңіп алса, 2-орын «Тәуелсіздік» тобына берілді.
Гүлжан Елубаева,
Талас ауданы, «Азиада» бөбекжай бақшасының әдіскері.
