Маңғыстауда жаңа теңіз портының құрылысы басталады: 23 желтоқсан 2025, жаңалықтар Turkystan.kz
Маңғыстау облысында көлік инфрақұрылымы жүйелі түрде дамып келеді. Қазіргі таңда жергілікті маңыздағы автомобиль жолдарының 97%-ы жақсы жағдайда. Сонымен қатар, жалпы ұзындығы 491 шақырымды қамтитын 16 жол жобасы бойынша құрылыс жұмыстары жүргізілуде, деп хабарлайды turkystan.kz.
Бұл туралы ОКҚ алаңында өңір әкімі Нұрдәулет Қилыбай мәлімдеді.
«Биыл Транскаспий халықаралық көлік бағыты арқылы жүк тасымалының көлемі 20%-ға артты. Осы бағытта «Semurg Invest» компаниясы 2027 жылға дейін флотты 6 кемеге дейін кеңейтуді жоспарлап отыр. Биыл 7 мың тонналық бір кеме теңізге шығарылды. Сондай-ақ, Құрық пен Алят (Әзербайжан) порттары арасында паромдық қатынасты дамыту көзделіп отыр. Қазіргі таңда екі паром Каспий теңізінің акваториясына кірді, ал жоба толық іске асқанда, бағытта 6 паром жұмыс істейді», — деді облыс әкімі баспасөз конференциясында.
Бұдан бөлек, 2026 жылы жаңа теңіз портының құрылысы басталады. Аталған жоба еліміздің транзиттік әлеуетін арттыруға бағытталған. Жоспарға сәйкес, жаңа порттың қуаттылығы Ақтау халықаралық теңіз портынан екі есеге дейін жоғары болады. Жобалар толық іске асқан жағдайда, 2030 жылға қарай Қазақстанның теңіз порттарының жылдық өткізу қабілеті 22,3 млн тоннадан 60 млн тоннаға дейін артады.
Толық нұсқасына гиперсілтеме беруді ұмытпаңыз: https://turkystan.kz/article/273324-mangystauda-zana-teniz-portynyn-qurylysy-bastalady
