Айшылық алыс жерлерден жылдам хабар алғызған деген Ыбырай Алтынсариннің теңеулі тіркесі пошта қызметкерлеріне арналып айтылғандай. Пошта қызметі сонау 400 жыл бұрын да болған деседі. Мифтік аңыздарда көгершін құсы хабарлама тасымалдаушы ретінде қолданылғандығы жиі кездесіп жатады. Міне, қазір дамыған заман, ақпараттық технологияның түрленген кезеңі болса да осы бір қызмет түрі өзінің құндылығын жойған емес. Алыста жүрген жақынының сағынышқа толы хатын яки сүйікті басылымын арқалай жететін пошташыны көргенде төбесі бір елі көкке жетердей қуанған аға буын өкілдері ортамызда әлі де баршылық.
Ал бүгінгі таңдағы пошташының қызметі сан түрлі. Қазіргі заман талабына сай жылдамдық, ыңғайлылық, қолжетімділік бұл салада да орын алған. Пошта мекемесі ең алыс жатқан ауылдық жерлерге пошта қызметімен қоса қаржылай қызмет көрсететін бірден-бір мекеме болып табылады. Осы орайда, 9-қазан дүниежүзілік пошта күні екендігін ескере отырып, аудандық пошта байланыс торабындағы қызметкерлердің аяқ алысын, салада болып жатқан жаңашылдықтар мен өзгерістер жайлы жазуды жөн көрдік.
Осы сала қызметкерлерінің өз ісіне асқан жауапкершілікпен қарайтындығының бір дәлелі-әлемді дүрліктірген қатерлі індет тәжтажалдың өршіп тұрған уағына қарамастан дамылсыз қызмет еткендігі. Карантин кезінде уақытша жалақысынан айырылған жандарға берілген 42500 теңгеге аудандық пошта байланыс торабынан 9571 жеке шот ашылған екен. Аудандық пошта бөлімшесінен барлық ауыл тұрғындары еңбекақысын, жәрдемақысын және аударма ақшаларын алды. Көпшілік бұрынғыдай ұзын-сонар кезекте тұрмайды, банкоматтан карточкамен де алуға жағдай жасалған. Сонымен қатар, «Хоум кредит», «Альфа», «Евразиский банк», «АТФ банк», «Азия» банктерімен келісімшарт арқылы аудан халқына несие беру жұмысын жандандыруда. Бұдан бөлек, депозит ашуға, «Каспий банк» арқылы рәсімделген тауарларды мекенжайына дейін жеткізуге, лоторея билеттерін, теміржол, әуе қатынастары билеттерін алуға болады. Жыл сайын жанданып келе жатқан салада жаңашылдық та жоқ емес. Оған аудандық пошта торабының басшысы Анархан Срайлованы әңгімеге тартқанда-ақ көз жеткіздік.
-Пошта саласында қызмет еткендіктен біз заман ағысымен қатар жүземіз, жаңашылдықтан қалыс қалуға әсте болмайды. Былтырдан бері іске асырылып келе жатқан жемісті жоба-«Әлеуметтік картаның» әлеуметке берері мол. «Қазпошта» АҚ әлеуметтік картасының өңірлерге байланысты төлем, көлік, жеңілдік тәрізді функционалдары бар. Оның арқасында жалақыны, зейнетақыны, жәрдемақыны және шәкіртақыны алып, қоғамдық көліктің ақысын төлеуге мүмкіндік бар. Кейбір өңірлерде оқушылар әлеуметтік карталардың көмегімен білім ордасына кіреді және мектеп асханасында төлем жасай алады. Сонымен бірге оларға балалар тарифі бойынша қоғамдық көлікте жүру мүмкіндігі қарастырылған. Әлеуметтік карталардың иелері post.kz сайтында жеңілдік рецептісі бойынша жазылып берілген және алынған дәрілерді қарай алады. Сонымен бірге жұмсалған ақшаның бір бөлігін қайтарып алу мүмкіндігі бар. Дәріханаларда, дүкендерде, сауда орталықтарында әлеуметтік карта арқылы жасалған төлемдер үшін кэшбэк қарастырылған. Әлеуметтік картаны кез келген қазақстандық тұрғын қолдана алады. Оны шығаруға рost.kz арқылы онлайн өтінім жолдау қажет немесе «Қазпошта» АҚ кез келген бөлімшесіне жүгінуге болады.
Қазақстанда әлеуметтік картаны қолданушылар қатары еліміздегі барлық өңірлерді есептегенде 280 мың тұрғынға жуық. Жаңа қызметті қолданушылар қатары күн санап артып келеді. Қызмет көрсету бірінші жылға тегін. Кейінгі жылдан бастап зейнеткерлер мен жеңілдік санатындағы азаматтар үшін қызмет құны жылына небәрі-300 теңге болады, ал балалар тарифі — 500 теңге, стандартты тариф — 800 теңге,-деді Анархан Тойбағарқызы.
Срайлова Анархан Тойбағарқызы басшылық ететін аудандық пошта байланыс торабында өз ісіне мығым, жауапты мамандар қызмет етеді. Елеулі күндерінде елге еңбегі өтіп жүрген сала қызметкерлерінің есімдерін атап өткеніміз жөн деп білемін. Олар АБПТ бастығының орынбасары И.А.Салих, жазылу бөлімінің маманы С.И.Назарова, бас маман М.О.Отыншиева, бас кассир Б.А.Турпанбаева, жетекші мамандар Қ.А.Қожамұратова, А.Мустафаева, сұрыптаушылар А.Алдашбек, Е.Н.Лябухова, А.Базарбаева, ООУ басшысы Г.О.Қуанбаева, операторлар Г.Н.Дүмшебаева, Д.Б.Газиева, салық басқармасының операторы А.Бейсенбайқызы, программист Б.Мурадов, инкассаторлар Д.И.Алпаров, С.Абдрасилов, Е.Жора, К.Байжарасов, Е.Шохан, Д.Нілдебаев, ауылдық бөлімнің басшылары Б.П.Искакова, К.М.Сураншиева, С.М.Жексеналиева, Б.Азбергенова, К.Шакирова, М.С.Уалиева, Б.Б.Омарова, А.Турсунбаева, Г.Даниярова, Б.Боскинбаева, Б.Құрманалиева, З.Ильясова, Р.Керимкулова, А.Оралбекова, Ж.Ақжолова, Шу қаласының бөлім басшылары Г.Қ.Қосалиева, А.Ю.Жук, А.Сеитова, ЖБО операторы А.Мырзабаева, ХҚКО операторы Д.Беримкулова, хат тасушылар З.Ержанова, И.Дильман, В.Дюндик, Е.Дюндик, Г.Кажиева, С.Адильбаева, Г.Шымбулатова, Н.Алшиева, А.Ахметова, Г.Тростьянская, Д.Тулебаева, А.Санбаева, Т.Спиридонова, Л.Румасова, В.Маркович, Л.Корягина, Р.Усенова, Л.Байкеева, А.Чаймухамедова, Т.Кабанова, С.Нуртаев, Н.Татаева. Р.Алшимбаева, С.Есибаева, А.Капанов, Г.Альтаева, Б.Бектемисовалар.
АПБТ қызметкерлерінің негізгі мақсаты-көпшілік көңілін тауып, адал қызмет ету. Осы тұрғыда аудандық пошта қызметкерлері халыққа ойдағыдай қызмет көрсетуде деп айтуға әбден болады. Өз қызметіне деген жаңашылдық пен жылдамдықты күн сайын арттыруға атсалысып отырған пошта қызметкерлері әрқашанда алдыңғы шептен табылсын!
