Жамбыл облысы әкімінің орынбасары Айжан Есмағамбетова Байзақ ауданындағы бірқатар медициналық нысандарды аралап, зерделеу жұмыстарын жүргізді. Зерделеу барысында өңірдегі денсаулық сақтау саласының қазіргі жағдайы мен халыққа көрсетілетін медициналық қызметтің сапасына ерекше назар аударылды.
Аудандық орталық ауруханасының бас дәрігері Жандос Рысқұлов медициналық мекемелердің қызметі, материалдық-техникалық базасы және атқарылып жатқан жұмыстар жөнінде жан-жақты ақпарат берді. Сонымен қатар, зерделеу жұмыстарына аудан әкімінің орынбасары Рүстем Қасымов қатысты.
Айжан Серікбайқызы Мырзатай дәрігерлік амбулаториясына, Аққия фельдшерлік-акушерлік пунктіне, Ақтөбе медициналық пунктіне және Үлгілі дәрігерлік амбулаториясына барды. Аталған нысандарда алғашқы медициналық-санитарлық көмек көрсету сапасы, ғимараттардың жағдайы, медициналық қызметкерлердің жұмыс барысы қаралды.
Зерделеу нәтижесінде облыс әкімінің орынбасары медициналық ұйымдарда халыққа қолжетімді әрі сапалы қызмет көрсету – басты міндет екенін атап өтіп, сала басшыларына бірқатар нақты тапсырмалар жүктеді.
Байзақ аудандық ақпараттық медиа орталығы
