Қазақтың ұлттық ағартушысы, ұстаз Ы. Алтынсарин «Кел, балалар, оқылық!» деп балаларды оқуға шақырғандай 1 қыркүйек – Білім күні барлық мектептер мен білім ордалары оқушылар мен білім алушыларға есігін айқара ашты.![]()
Бүгін Сарысу ауданының әкімі Сәкен Мамытов Саудакент ауылындағы Б.Қашқынбаев атындағы орта мектебінде болып, ұстаздар мен ата-аналарды, оқушыларды Білім күні мерекесімен құттықтады: — Білім – адам баласының өмірлік серігі, өз тағдырының тұғыры болса, білімді, тәрбиелі ұрпақтың бастауы – білім ошақтары. Еліміздің өсіп-өркендеуі — ұлттық білім жүйесінің деңгейіне, даму бағытына, мектеп біліміне тікелей байланысты. Сондықтан да, білім беру жүйесін дамыту мемлекеттік саясаттың басым бағыттарының бірі, — деген аудан басшысы ұстаздар мен оқушыларға жаңа жетістіктер мен ізденістер, шығармашылық табыстар тіледі.
Айта кетейік, бүгінгі таңда, ауданымыздағы іргелі білім ошақтарының бірі — Байқадам Қашқынбаев атындағы орта мектебіне «Ауыл-Ел бесігі» жобасы шеңберінде ауылдық елді мекендердегі әлеуметтік және инженерлік инфрақұрылым бойынша іс-шараларды іске асыру бюджеттік бағдарламасымен күрделі жөндеу жұмыстары жасалып, жаңа оқу жылында пайдаланылуға беріліп отыр. 520 орындық мектепте 318 оқушы білім алады. Мұнда шахмат, волейбол, тоғыз құмалақ, асық ату, футбол, баскетбол, «Айбын» әскери патриоттық және бокс үйірмелері жұмыс жасайды.Салтанатты шара оқушылардың мерекелік сазды бағдарламасымен жалғасты.Күздің қуанышқа толы алғашқы күні әр оқушыға ерекше әсер қалдырып, жаңа оқу жылы басталып кетті.
Бүгінгі Білім күні осындай салтанатты шара ауданның барлық мектептерінде өтті.
