Білім — кез келген ел үшін ең маңызды саланың бірі. Сондықтан да оған кең қолдау жасалуда. Соның анық айғағы Шу ауданында көрініс табуда. Бүгінде Шу өңірінде 93 білім беру ордасы жұмыс істейді. Оның 47-і мектеп, 1-і кешкі мектеп, 38-і балабақша, 7-і мектептен тыс мекеме, 1-і коррекциялық кабинет.
2020-2021 оқу жылында аудандағы 47 мектепте оқушы саны 21 125-ні құрап, 2216 бүлдіршін оқу ордасының табалдырығын алғаш аттаған.
Мемлекеттік қызмет көрсету сапасын арттыру бойынша аудан аумағындағы барлық орта білім беру мекемелері мен балабақшаларға балаларды қабылдау, кезекке қою және жолдама беруді автоматтандыру негізінде «edugarden.kz», «eduschool.kz» сайттары арқылы қабылдануда. Соның нәтижесінде өңірдегі 3-6 жас аралығындағы балғындар 100 пайыз мектепке дейінгі білім берумен қамтылған.
Мектептерде жалпы 2478 педагог жұмыс істесе, оның 2363-і жоғары, 109-ы арнаулы орта білімді. Олардың қатарында жоғары, 1-санатты педагогтердің үлес салмағы басым. Сондай-ақ жас мамандардың да қатары жыл сайын артуда.
Білім ордаларын сапалы оқулықтармен қамтамасыз етуге де ерекше екпін түсіріліп, осы мақсатта биыл 250 млн.теңге бөлінген. Соның арқасында барлық оқушылар оқулықтарға қол жеткізді.
