Меркіде рейдтік жұмыстар жүргізілді

Меркі ауданында сібір жарасының алдына алу бойынша рейдтік жұмыстар жүргізілді. Аудан әкімінің орынбасары Бақытхан Абжапаров «Атабек» мал базарында болып, малдардың арасында жұқпалы түрде жүретін сібір жарасының алдын алу бойынша түсіндірме жұмыстарын жүргізді.
Сібір жарасы — бұл жұқпалы ауру. Адамдар ауру жұқтырған жануарлардан жұқтыруы немесе малдан алынатын бұзылған өнімдер арқылы жұқтыруы мүмкін.
Сібір жарасы, әдетте, жануардан жануарға немесе адамнан адамға жұқпайды. Сібір жарасы спораларын жұтқан кезде, деммен жұтқанда немесе жара не кесілген жері арқылы ағзаға енген жағдайда, олар өсіп, көбейіп, токсиндерді шығаруы мүмкін. Егер адамдар ауру малға қараса не ауру малды союға қатысса немесе ауру жұқтырған малдан алынатын өнімдермен (мысалы, ет, қан, жүн, тері, сүйектер) жанасатын болса, адамдар сібір жарасын жұқтыруы мүмкін. Сібір жарасы — жануарлар мен адамдардың өміріне үлкен қауіп төндіретін аса қауіпті жұқпалы аурулардың бірі. Сібір жарасының қоздырғышы қоршаған ортада тұрақты. Топырақта ол ондаған жылдар бойы сақталады. Қайнауда 45-60 минуттан кейін ғана күйдіргі микробының споралары өледі.
Бүгінгі күнгі жоспарға сәйкес Меркі ауданында 54000 бас мүйізді ірі қара, 309150 бас қой-ешкі, 19678 жылқы, 110 бас Түйе және 500 шошқа малына сібір жарасына қарсы вакцина егіліп, профилактикалық сақтық шаралары жоспарлы жүргізілді. Бұл шара сібір жарасынан қорғанудың бірден бір жолы. Ал барша облыс жұртшылығын ет және ет өнімдерін оның қауіпсіздігі мен сапасына бақылау жүргізілетін, яғни рұқсат етілген ресми базарлардан, дүкендерден, сауда орталықтарынан ғана сатып алған дұрыс болатындығын ескертеміз. Ал, тамақ дайындау кезінде және пісіру кезінде шикі еттің дәмін татпау, ет пен ет өнімдерін мұқият қайнатып, қуыру, міндетті түрде термиялық өңдеуден өткізіп барып пайдаланған жөн.