Бүгін аудан бойынша білім ордаларында түлектерге аттестат табыстау рәсімі өтіп, 11-сыныпты аяқтаған оқушылар алтын ұяларымен қоштасты.
Аудандағы ілгері мектептердің бірі – №17 Иван Трубицын атындағы жалпы орта білім беретін мектеп-гимназиясында өткен аттестат тапсыру рәсіміне аудан әкімі Баубеков Жорабек Нұрмергенұлы қатысты.
Аудан әкімі түлектерді мектеп бітіріп, аттестат алуларымен құттықтап, ізгі тілегін білдірді. «Құрметті түлектер мен ата-аналар! Бүгінгі аттестат табыстау рәсімі баршаңызға құтты болсын! Әрбір ата-ана өз баласының еліне елеулі, халқына қалаулы азамат болуын тілейді. Менің балам үлкен азамат болса екен деп үміт артады. Сондықтан, құрметті түлектер, бүгінгі аттестат алып, үлкен өмірге басқан қадамдарыңыз құтты болсын! Болашақта өздерің таңдаған мамандық иесі болып, елімізді дамытуға, көркейтуге үлес қосатын үлкен азамат болуыңызды тілеймін. Өйткені, еліміздің ертеңгі мен болашағы мына сіздердің қолыңызда! Баршаңызға бақыт, болашақтарыңызға сәттілік тілеймін», – деді Жорабек Нұрмергенұлы.
Салтанатты шарада мектеп директоры Асипа Қалқабаева ұжымды оқу жылының табысты аяқталуымен құттықтап, мектеп оқушылары мен ұстаздарының жеткен жетістіктеріне тоқталды.
Жалпы бұл мектепте биыл 230 педагог қызмет атқарып, 2166 оқушы білім алған. 2022-2023 оқу жылында 11-сыныпты 134 түлек аяқтаса, оның ішінде, 3 оқушы – «Алтын белгі» иегері атанып, 6 оқушы – «Үздік» аттестатпен мектепті тәмамдап отыр. Сондай-ақ, осы оқу жылында гимназия оқушылары мен ұстаздары көптеген халықаралық, республикалық және облыстық жарыстарда жеңіске жетіп, жүлделі орындаға ие болған. Халықаралық олимпиадаларда 7 оқушы, облыстық пән олимпиадасында 9 оқушы жеңімпаз атанған. Химия пәнінің мұғалімі Наталья Черкасова Республикалық «Педагогикалық идеялар фестивалі» байқауында 3-орынды иеленсе, облыстық «Педагогикалық идеялар фестивалінде» – 2 мұғалім, облыстық «Үздік авторлық бағдарлама» байқауында – 3 мұғалім жеңімпаз болған.
Сонымен толғанысқа толы сәт те жетіп, аудан әкімі «Алтын белгі» иелеріне куәліктерін салтанатты түрде табыстады. Ары қарай, аудандық білім бөлімінің басшысы Айгерім Алтынбаева «Үздік аттестат» иелерін марапаттаса, мектеп директоры оқушыларға аттестаттарын тапсырды.
Айта кетейік, биылғы оқу жылында жалпы аудан бойынша 853 оқушы 11-сыныпты тәмамдаса, оның ішінде, 612 оқушы Ұлттық біріңғай тестілеуге қатысқан. Сонымен қатар, 18 оқушы «Алтын белгі» иегері атанып, 88 түлек «Үздік аттестатқа» қол жеткізіп отыр.
