Таразда түзету мекемесіндегі сотталғандар кестеге сәйкес дін өкілімен кездесті.
Жамбыл облысы бойынша Қылмыстық-атқару жүйесі департаментіне қарасты ЖД-158/2 түзету мекемесіндегі бас бостандығынан айырылған азаматтар дін өкілімен кездесті. Басқосу барысында Тараз қалалық «Фирдаус» мешітінің бас имамы Алмас Кенжемолдаев сотталғандармен «Мухкам және муташаббиһ аяттар» тақырыбында топтық кездесу ұйымдастырылды.
– Алланың сөзі – Құран Кәрімдегі аяттар екі түрлі. Бірі – мухкәм, екіншісі – мутәшәбиһ. Мұны Құранның өзі осылай баяндайды. «Әли Имран» сүресінің 7-аятында Алла Тағала «Ол саған Құранды түсірді. Ондағы аяттардың бір бөлігі мухкәм аяттар, міне, солар Кітаптың анасы (негізі). Ал енді, бір бөлігі – мутәшәбиһ аяттар», – деген. Ендеше, бұл сөздердің мағынасына тоқталайық. Қысқаша айтсақ, ғалымдарымыз бұл аяттарға мынадай мағына берген:
Мухкәм дегеніміз – мағынасы анық, ашық, ешқандай астарлы мағынаны білдірмейтін, түсінілуі үшін сырттан келетін бір дәлелге мұқтаждығы жоқ аяттар.
Ал, мутәшәбиһ дегеніміз – бірнеше мағынаға ықтималы болғандықтан, нақты мағынасын білу қиынға соғатын, ғұрыптық немесе тілдік ерекшеліктерге байланысты негізгі мағынасына емес, басқа астарлы мағынасына жорамалдауды қажет ететін аяттар, – деді бас имам өз сөзінде.
Басқосу барысында Алмас Кенжемолдаев кездесу тақырыбына сай кеңінен тоқталып, сотталған азаматтардың сұрақтарына тұщымды жауаптарын берді.
