Елдік пен ерлік — қазақ халқының мәңгілік ұраны. Биыл қазақ-жоңғар соғысының айтулы қаһармандарының бірі — Қосы батыр Сәмбетұлының туғанына 355 жыл толуына орай, Суханбаев ауылдық округінің Қосы батыр ауылында мерейтойы кең көлемде атап өтілді. Тарихи тұлғаның есімін ұлықтауға арналған мереке елдік рух пен бірліктің нағыз көрінісіне айналды.
Мерекелік жиын Қосы батыр рухына құран бағыштаудан басталды. Жиналған қауым батыр рухына тағзым етіп, өткеннің өнегесін еске алды.
Мерейтойдың маңызды бөлігі – ғылыми-тәжірибелік конференцияда тарихшылар мен өлкетанушылар Қосы батырдың өмір жолы, оның тарихи дәуірдегі орны, ел қорғаудағы қызметі жайында мазмұнды баяндамалар жасады. Сонымен қатар, оның ерлік жолын терең талдап, тың деректер ұсынды.
Конференция соңында қатысушылар батыр есімін жас ұрпақ санасына терең сіңіру жолдарын талқылап, тарихи мұраны зерттеу жұмыстарының жалғасатынын айтты. Бұдан кейін мерекелік көңіл-күй сыйлайтын концерттік бағдарлама көрермен назарына ұсынылды. әл-Фараби атындағы аудандық мәдениет үйінің өнерпаздары ән-жырдан шашу шашты.
Бұдан соң қазақша күрес, қошқар көтеруден жарыс өтті. Жарысқа өңірдің үздік балуандары қатысып, Қосы батырдың ерлік рухын бойларына сіңіргендей, намысты дода көрсетті. Ерік-жігері мен намысы сыналған спортшыларға арнайы сыйлықтар мен Дипломдар табыс етілді.
Мерейтой соңы Үшбұлақ ауылы маңындағы ипподромда «Қосы батыр» қорының демеушілігі арқылы ұйымдастырылған аламан және құнан бәйгеге ұласты. Аламан бәйге қашықтығы 35 шақырым, құнан бәйге 15 шақырым болып белгіленді. Жүйрік тұлпарлармен бірге шабандоздардың жігері сынға түскен сәтте, дала төсінде нағыз ұлттық рух сезілді.
Қорыта айтқанда, Қосы батыр Самбетұлының 355 жылдығы – өткен тарихқа тағзым, бүгінгі ұрпаққа өнеге болған мерейтой. Бұл шара ел жадындағы ерлерді дәріптеп қана қоймай, халықтың бірлігі мен намысын тағы бір мәрте асқақтатты.
Байзақ аудандық ақпараттық медиа орталығы
