Шаңырағына шыр етіп ұл дүниеге келсе, атұстарым келді деп ақсарбас шалып, шаттанатын халқымыз ер азаматты ерекше қадірлеп, барынша берік болуы үшін барын аямаған. Қазіргі заманға қажетті жауапкершілік, өршіл рух, сана, мәдениет,спорт секілді дүниелер өзін жігітпін деген жанның бойынан табылуы тиіс. Бір сөзбен айтқанда Есенқұл ақынның «Біздің елдің жігіттері» деген әнінің әрбір жолына сай адамды жігіттің төресі деп тануға толық негіз бар.
Жуырда Жамбыл облыстық Жастар ресурстық орталығы «Жігіт сұлтаны-2021» байқауын ұйымдастырған болатын. Тараз қаласы мен Меркі, Қордай, Талас, Сарысу аудандары қатысқан додада жерлесіміз Нұридин Сейсеналы да бақ сынаған-тұғын. Н.Сейсеналы сұрақ-жауап,16 келілік гір тасын көтеру, ат әбзелін атап беру, өзін таныстыру мен өнерді орта салу секілді кезеңдерде сыннан сүрінбей өтіп, жүлделі 1 орынға ие болды. Жерлесіміздің сөз саптауын, жауаптардың дұрыстығын, актерлік шеберлігін, сахна мәдениетін білуін, спортқа икемділігін жоғары бағалаған әділ қазы алқасы сайыс соңында сертификат тапсырып, марапат қағазын ұсынды.
