Таразда нан бағасының қымбаттауына халықтың екіұдай пікірде екендігі анық. Бұл мәселе наубайхана иелерінің өтінішімен жыл басынан бері көтеріліп келеді. Оған бірнеше себеп те бар. Мәселен, 2018-2019 жылдан бері солтүстік өңірдегі бидай бағасының 75 теңгеден 95 теңгеге, 1 сұрыпты ұнның 110 нан 125 теңгеге дейін өскені әсер етуде.
Ұнның нан бағасына әсерін тежеу үшін 2019 жылдың 5 наурызынан бастап бүгінгі күнге дейін тұрақтандыру қорынан төмендетілген бағадан наубайханаларға ұн босату шаралары қолданып келген. Осылайша өткен 2020 жылы және ағымдағы үш ай аралығында 3500 тонна ұн босатылды. Жалпы екі жыл ішінде нан бағасын тұрақтандыру шараларына жергілікті бюджет есебінен 98 млн. теңгенің шығындары өтелді.
Айта кету керек, облыста өндірілген астықтың ұны, сапа көрсеткіштеріне сәйкес нан өндірісінде қолданылмайды (клейковиналық сапасына байланысты ИДК). Осыған орай біздегі нан бағасы Солтүстік өңірден жеткізілетін ұн мен бидай бағасына тәуелді.
Бүгін Тараз қаласының әкімі Ержан Жылқыбаев шаһардағы ең ірі наубайханаларды аралап, иелерімен ары қарай бағаны көтермеу жолдарын талқылады.
Осы орайда наубайхана иелерінің де өз уәжі бар. Егер баға көтерілмесе бөлке нанның сапасы мен салмағы төмендейтіндігін алға тартты. Мәселен тандыр нанның салмағы 300 гр, бірақ, бағасы 150 теңге. Ең арзаны — 100-теңге. Ал, әлеуметтік нан болып саналатын бөлке нанның салмағы – 600 гр. Бірақ, бағасы әлдеқайда арзан. «Сондықтан, әлеуметтік нанның сапасын сақтап қалу үшін бағаны тағы да 5 теңгеге, яғни, алдағы уақытта 95 теңгеге көтеру — мәжбүрлі түрдегі шара» дейді наубайхана иелері.
Қазірдің өзінде барлық ірі сауда орындары мен «Хлебный дар» дүкендерінде нан бұрынғы бағамен сатылуда. Ал, әлеуметтік дүкендерде 75 теңге болып қалды.
Қала әкімі наубайхана иелері мен халықтың да пікірін ескере келе нан бағасын тұрақтандыру жолдарын Әлеуметтік кәсіпкерлік корпорациясымен бірлесе талқылайтындығын жеткізді.
