Қордай ауданының өнеркәсіп кәсіпорындары биылғы 6 айда 6999,9 млн. теңгенің өнімін өндіріпті. Жыл басынан негізгі капиталға салынған жалпы инвестиция көлемі 8713,9 млн. теңгені құраған. Бұл жөнінде Қордай ауданының әкімі Байтөле Болатбек Өңірлік коммуникациялар қызметінің алаңында журналистермен жүздескен брефингте мәлімдеді, – деп хабарлайды «shanyraqinfo.kz» ақпарат агенттігі.
Жаңа бизнес-бастамаларды қолдау «Бизнестің жол картасы-2020» бағдарламасы аясында биыл 3 жобаны 740 миллион теңгеге іске асыру жоспарланыпты.
– Еліміздің 2015-2019 жылдарға арналған мемлекеттік индустриалды-инновациялық даму бағдарламасының аясында аумақтық индустриаландыру картасына енгізілген жалпы жобалық құны 49 миллиард 840 миллион теңгені құрайтын 6 жоба іске асуда. Жыл басынан бері ауыл шаруашылығы өнімінің жалпы көлемі 10158,8 миллион теңгені құрады. Бүгінгі күнге ауылшаруашылық саласына 1281 миллион теңгеге инвестиция тартылды. Егістік алқаптары өткен жылғыдан 593 га артып, аудан бойынша барлық ауыл шаруашылығы мақсатындағы егістік жерлердің көлемі 132039 га болды. Ауылдық жерлерді таза ауыз сумен қамтамасыз ету мақсатында өткен жылы республикалық және облыстық бюджеттен 781,3 миллион теңге қаржы бөлініп, Ауқатты ауылындағы сумен жабдықтау жүйелері қайта жаңғыртылып, Әлжан ана ауылындағы сумен жабдықтау жүйелерінің құрылысы басталды. Ағымдағы жылы құрылыс жұмыстары аяқталады деп жоспарлануда, — дейді Байтөле Байқонысұлы.
Ауылдық жерлерде медициналық нысандарды көбейту мақсатында мемлекеттік-жекеменшік серіктестік арқылы Қалғұты, Кенен, Бел, Мұзбел, Сарбастау және Қызылсай ауылдарына ауылдық амбулатория мен фельдшерлік пунктер салу бойынша жұмыстар басталыпты. Ал, мәдени ошақтардың қатарын көбейту мақсатында «Мәдениет объектілерін дамыту» бағдарламасымен Отар ауылына 180 орындық және Жамбыл мен Қарасу ауылдарында 90 орындық мәдениет үйлерінің құрылысын салу үшін жобалық-сметалық құжаттама әзірлеуге 13,1 миллион теңге қарастырылған. Сондай-ақ, аудан бойынша 11 ауылдық кітапханада цифрландырылған ақпараттық орталық ашылу жоспарланған.
